13. 11. 2019: В Бенятинї посвятили основный камінь монастыря

Із нагоды 1400-річніцї од смерти св. Йоана Милостивого в православнім Катедралнім соборї Успенія Пресвятой Богородіцї в Кошіцях, котрый є присвяченый і мену спомянутого святого, в недїлю, 10-го новембра 2019-го року, проходила торжественна архієрейска літурґія.

Окрем домашнёго михалївско-кошіцького архієпіскопа Высокопреосвященого Ґеорґія служыли єй і владыкове із заграніча. Інформовав о тім Офіціалный сайт Православной церькви на Словакії.

На торжестві брали участь Высокопреосвященый Амфілохіє, чорногірьско-приморскый метрополіта із Сербской православной церькви і Высокопреосвященый Антоній, метрополіта бориспольскый і броварьскый з Україньской православной церькви з благословлінём метрополіты Онуфрія.

В тот самый день вечур архієреї навщівили місце, на котрім має быти збудованый Монастырь св. Василія Острожского. Монастырь має стояти в селї Бенятина, в окресї Собранцї. В Бенятинї посвятили ёго основный камінь.

Метрополіта Амфілохіє в приговорї участным повів, же тот монастырь буде представлёвати карпатьскый Остроґ (Остроґ – знамый сербскый православный монастырь в Чорній Горї, позн. ред.) і єдночасно спомянув, же посвячінём основного каміня Василій Острожскый якбы вертав ся до своёй отцюзнины, бо за словами метрополіты ёго предкове і предкове вшыткых Сербів походили якраз із Карпатьской области. Метрополіта Антоній приобіцяв молитвы за выбудованя нового монастыря і выразив надію, же монастырь чімскоріше буде выбудованый і він буде позваный на ёго посвячіня.

Село Бенятина має славного родака Андрія Бачіньского, котрый быв в роках 1773 аж 1809 мукачівскым ґрекокатолицькым єпіскопом.

Петро МЕДВІДЬ, ЛЕМ.фм