12. 9. 2019: МЕДЖІ РУСИНІВ ДНЕСЬ ПРИЙДЕ ПРЕЗІДЕНТКА СР ЗУЗАНА ЧАПУТОВА

Днесь, 12-го септембра 2019, є про Русинів Словакії вызначный день, бо першыраз в новодобій історії меджі нас прийде глава штату.

На стрїчу з представителями русиньскых орґанізацій і інштітуцій завітать до Пряшова презідентка Словацькой републікы Зузана Чапутова. Стрїча, котра буде проходити в просторах Словацького народного музея – Музея русиньской културы в Пряшові, зачне о 16.30 год. Темы, о котрых хотять Русины на стрїчі бісїдовати суть, наприклад, вылюднёваня русиньского реґіону, школство, култура, язык і ёго хоснованя, задача церькви в области русиньского душпастырьства, як і іншы проблемы русиньской народностной меншыны.

Анна КУЗМЯКОВА, Русин.фм