12. 6. 2019: Лавреатом юбілейного Духновічового Пряшова став Кевін Выравець

10-го юна 2019-го року Велика сцена Театру Александра Духновіча привітала юбілейный 20-ый річник цíлословацького конкурзу в декламації русиньской поезії, прозы, властной тврчости і малых сценічных форм –Духновічів Пряшів 2019.

Цїлословацькый русиньскый конкурз декламаторів традічно опередили окресны або реґіоналны конкурзы, до котрых і тот рік залучіли ся стовкы дїтей. На змаганя в Пряшові поступили тот рік лем тоты найлїпшы, значіть декламаторы, котры скінчіли в окреснім конкурзї у своїй катеґорії на першім місцї. На сценї нашого професіоналного театру ся так замагало 65 участных, з них дакілько было такых, котры ся вказали в двох жанровых катеґоріях.

 

На юбілей были оцїнены і писателї, і педаґоґы

Духовнічів Пряшів тот рік написав уж свій 20-ый річник. Юбілейне змаганя одкрыв своїм приговором председа Русиньской оброды на Словеньску, головного орґанізатора конкурзу, Мартін Караш. По нім приговорила ся участным і Анна Кузмякова, котра тоту днесь вже традічну подію перед двадцятьма роками засновала.

Кедьже тот рік святковав ся юбілей шторічного праздника русиньского літературного слова, орґанізаторы вырїішыли, же ся в першій части проґраму удїілять дяковны діпломы писателям і педаґоґам, котры при Духновічовім Пряшові стояли од початку. Дяковныма діпломы были оцїнены писателі Осиф Кудзей, Миколай Ксеняк, Штефан Смолей і Штефан Сухый. Із педаґоґів собі діплом перевзяли Марія Ґоцова, Івета Мелничакова і Власта Мороховічова.

 

Лавреатом став Кевін Выравець

По святочнім одкрытю вже зачала конкурзна часть проґраму. Порота в складї Маріян Марко – директор Театру Александра Духновіча (ТАД) як председа, Іґор Латта – довгорічный член драматічного колектіву ТАД, Осиф Пантликаш – член драматічного колектіву ТАД, Анна Кузмякова – основателька конкурзу, і Петро Медвідь, выслухала участных в шестёх віковых катеґоріях, котры были іщі подїлены на жанры – поезія, проза, властна творчость, духовна декламація, народне розповіданя і малы сценічны формы.

Окрем оцїнёваня окремых віковых і жанровых катеґорій порота мусила вырїшыти і о цїлковім вітязовь 20-го річника Духновічового Пряшова, як і о участникови, котрый здобуде Ціну Матицї словацькой.

На основі рїшіня пятьчленной пороты тот рік Ціну Матицї словацькой здобыла Лавра Фузеріова із Основной школы н аул. Коменьского у Свіднику, котра декламовала в 3-ій віковій катеґорії прозу. Цїлковым вітязом юбілейного конкурзу Духновічів Пряшів, значіть лавреатом, став Кевін Выравець, з той самой школы. Лавреат выступав у третїй віковій катеґорії з властнов творчостёв. Тогорічный лавреат сповнёвав єдно із главных условій, же брав участь на Духновічовім Пряшові вже вецераз і порота може відїти як з рока на рік ёго умелецька декламація ся зліїшує.

 

Подякованя педаґоґам

Про дїти і тот рік быв приготовленый забавный проґрам, котрым собі скоротили час, покля порота рїшала о резултатах конкурзу. Тот приготовили герцї Театру Александра Духновіча в Пряшові Зденка Кваскова, котра была і конференцьєрков святочной части одкрытя конкурзу, і Івета Фейкова.

Велика вдяка і тот рік належыть педаґоґам, котры приготовлюють велике множество дїтей на русиньскый конкурз в декламації, кедьже і реґіоналны конкурзы суть наповнены, наперек тому, же лем на малім чіслї школ учіть ся русиньскый язык.

Духновічів Пряшів 2019 з публічных жрідел підпорив Фонд на підпору културы народностных меншын, а так само і Окресный уряд в Пряшові – одбор школства.

Петро МЕДВІДЬ, ЛЕМ.фм