12. 3. 2023: Музей в Гуменнім позывать на Карпатьску писанку 2023

Вігорлатьскый музей в Гуменнім вєдно з партнерами позывають на XXXI. рочник меджінародной выставы писанок Карпатьска писанка 2023. Як інформовала за музей Яна Федічова, святочна вернісаж вєдно з оцїнёванём конкурзу одбуде ся 16-го марца 2023.

Покровительство на тогорічнов Карпатьсков писанков перевзяв амбасадор Словацькой републікы на Україні Марек Шафін і председа Пряшівского самосправного краю Мілан Маєрьскый.

Цїлём меджінародого конкурзу і презентачной выставы Карпатьска писанка є підпора традіції писанкарьства як вызначного елементу културной дїдовизны карпатьского реґіону. Намагов Вігорлатьского музея єдночасно є глядати творцїв писанок, і давати простор про творчу конфронтацію, штудіум традічной културы, розвиток творчой і технічной способности дїтей, молодежи і дорослых з різных реґіонів Словакії і заграніча.

Тогорочна подія з погляду утримованя сполочной традіції як вызначного елементу взаємной културной сполупраці карпатьскых пригранічных країн здобывать нелем сімболічне значіня.

Честным гостём події Карпатьска писанка 2023 є Музей писанок в україньскім містї Коломыя, котрый є своїм замірянём научного баданя і презентації писанкарьства єдиным у світї. В сітуації, в котрій сучасна Україна находить ся, музей хоче такым способом своїм довгорочным партнерам уможнити презентовати свою унікатну културну дїдовизну на Словакії.

В актуалнім рочнику представлює музей писанкы із Словакії, Чеськой републікы, Україны, Польщі і Мадярьска. Выставлёваны колекції доповнюють писанкы із збіркового фонду Вігорлатьского музея в Гуменнім, котры документують розвиток традіції того уменя в карпатьскій области од минувшого столїтя.

Дотеперь Вігорлатьскый музей выставлёвав высше 26 тісяч писанок із Словакії і заграніча. В просторах музея почас дотеперїшнїх рочників презентовало ся скоро 800 авторів з різных реґіонів Словакії, Чеськой републікы, Польщі, Україны, Мадярьска, Румунії і Споєных штатів Америкы.

2-го і 3-го апріля в рамках выставы одбуде ся в музею і Великодный ярмарок писанок, орґанізовати ся почас тырваня выставы будуть і творчі варштаты про школы.

Выстава Карпатьска писанка 2023 буде в Ґалерійній салї Ореста Дубая, і приступна буде од 16-го марца до 30-го апріля.

Петро МЕДВІДЬ, ЛЕМ.фм. Ґрафічна і языкова коректура: АРК в СР.