12. 11. 2020: Перед 30-ма роками служыли першу літурґію на горі Звір

11-го новембра 2020-го року минать точно тридцять років, одколи была одслужена перша літурґія на горї Звір в селї Літманова, Старолюбовняньского окресу.

Літурґію одслужыв втогдышнїй містный адміністратор ґрекокатолицькой парохії Ян Завацькый з Василём Кормаником, якый быв у тім часї ректором богословской семінарії в Пряшові. О рочніцї першой літурґії інформовав Михал Павлишіновіч із Інформачного центра Пряшівской архієпархії.

Літурґія почас одпусту

Перша літурґія на горі Звір, де од 5-го авґуста 1990-го року до 6-го авґуста 1995-го року мали проходити зьъявіня Пречістой Дївы, одбыла ся в рамках празднованя одпусту в Літмановій. Церьков є в селї присвячена святому Михаілови Архістратигови, котрый має день в літурґічнім календарї 8-го новембра.

„Была то недїля 11-го новембра 1990-го року і я быв позвасный до свого родного села Літманова служыти святу літурґію і проповідати в рамках одпустового празднованя у парохіалнім храмі, котрый є присвяченый святому Михаілови Архістратигови. По сполочнім дополудняйшім празднованю в храмі сьме пополюдне вєдно з отцём Яном Завацькым і з дївчатами – Іветков а Катков (візіонарькы, позн. ред.), служыли першыраз літурґію на горі Звір в деревяній хыжі – майданї. Остатнї люде стояли вонка,“ споминать на тоту подію Василь Корманик.

Поволїня служыти літурґію на горі Звір дав втогдышнїй пряшівскый єпарха, владыка Іоан Гірка.

Наймолодше путницьке місце Пряшівской архієпархії

Гора Звір є наймолодше путницьке місце Пряшівской ґрекокатолицькой архієпархії. Церьков доднесь бадать, ці зъявіня были досправдовы. Меджі роками 1990 аж 1995 ся мала двом молодым дївкам Іветї Корчаковій і Катаринї Чеселковій зъявляти Пречіста Дїва. Моментално є цїла документація зъявінь вєдно з посолствами загнана на посуджіня на Конґреґацію доктріны віры у Ватіканї.

Літманівска Гора Звір є путницькым місцём од 7-го септембра 2008-го року. Пряшівскый архієпіскоп і метрополіта Іоан Бабяк выголосив довтогдышнє місце молитвы на горі Звір за путницьке місце на основі факту, же од 1990-го року до Літмановой путує велике множество людей із Словакії, але і споза граніць, „і многы свідоцтва бісїдують о тім, же путници в Літмановій находять страченый покій душы, черьпають Божу поміч і по тайнї покаяня зачінають новый період жывота,“ пише ся в установлюючім декретї

За головный праздник є становлена недїля по першій пятніцї в місяцї авґуст. Гора Звір має од 2010-го року духовне путо з папсков базиліков Santa Maria Maggiore в Римі, котра є першым і головным маріяньскым храмом.

Петро МЕДВІДЬ, лем.фм, языкова управа: ред. АРК в СР.