12. 10. 2022: Вігорлатьскый музей має за собов успішну сезону
Музей мав понад 27 тісяч навщівників.
Вігорлатьскый музей в Гуменнім закінчів ку 30-му септембру 2022-го року лїтню музейну сезону. Наперек непрязным дослїдкам протипандемічных наряджінь в попередніх роках, інштітуція може похвалити ся в рамках тогорічной лїтнёй сезоны рекорднов навщівностёв.
„Музей тым потвердив добрї выбрату маркетінґову стратеґію ословлїня людей музейным портфоліём подїй, успішно закінчів і обнову каштеля,“ інформовала за музей Яна Федічова. Актуална сезона была закінчена у сполупраці з Містьскым културным центром в Гуменнім концертным проґрамом чеського орхестра Virtuosi di Praga в рамках меджінародного музичного фестівалу Pontes 2022.
Рекордна навщівность
Вігорлатьскый музей заперать сезону за період місяців май – септембер 2022 успішно. Помострити собі ёго експозіції пришло 27 412 людей із Словакії і заграніча.
В порівнаню з єднакым періодом минувшого року тото чісло наросло о скоро 14 і пів тісяч навщівників. Із загранічных найвекшу ґрупу творили навщівници з Чеськой републікы, Польщі, Мадярька, але были і навщівници споза моря. Тогорічна кількость навщівників за лїтнїй період є докінця высша як навщівность музея за цїлый попереденій рік.
Навщівників притігать каштель і сканзен
Основнов музейнов понуков і тот рік од мая до септембра были експозічны просторы, конкретно умелецько-історічна, сакрална, природонаучна експозіція в каштелю, і експозіція народной архітектуры і бываня (сканзен, де суть і памяткы з русиньскых сел реґіону), котры почас років навщівило скоро 18 600 навщівників.
Найвыглядаванїшов была знова умелецько-історічна експозіція в каштелю, збогачена о множество цїнных новых збірковых аквізіцій. Експозіція притягла майже 8000 навщівників.
Окрем сталых выстав музей заінтересовав і різныма выставныма проєктами, орґанізованьом традічной Карпатьской писанкы, але і вшелиякыма зажытковыма подїями, концертами, творчіма варштатами або фестівалами.
Наприклад, День традічных ремесел в сканзенї Вігорлатьского музея, котрый быв присвяченый школярям, навщівило почас єдного дня скоеро тісяч школярїв матерьскых, основных і середнїх школ Пряшівского і Кошіцького самосправного краю.
Рихтують публікації
Актуално в мімосезоннім періодї музей приготовлює выставны проєкты, освітнї проґрамы про дїти, а на кінцю рока події про шыроку публіку в области історії, традіцій і кумшту.
Єдночасно музей приготовлює новы публікації, котрыма хоче інштітуція продовжовати в успішных музейных публікаціях, як і календарёвы выданя, котры в минулости вже здобыли оцїнїня.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.