12. 10. 2019: Промітаня філму Воскресеніє народа і бісїда з ёго продуцентков

Кінцьом юла 2019-го року одбыла ся в пряшівсім Театрі Александра Духновіча премєра нового документарного філму Воскресеніє народа. То вже третїй документ продуцентьской двойцї Джон Ріґетті і Марія Сілвестрі, котрого выробу підпорила Фундація Джона і Гелены Тімовых (John & Helen Timo Fondation). 

Філм є од зачатку септембра досупный і в сервісі Youtube, но в місяці октобер суть напланованы три публічны промітаня, по котрых буде мож бісїдовати з продуцентков Маріёв Сілвестрі, яка до Европы прийде із Споєных штатів Америкы. Філм буде мож відїти в Братїславі, Пряшові і Ґорлицях.

Воскресеніє народа захоплює через своїх розповідачів – Олену Дуць Файфер, Анну Кузмякову, Теодозію Латтову, Кветославу Копорову, Франтїшка Крайняка, Павла Роберта Маґочія, Маріяна Марка, Анну Плїшкову, Діна Полоку, Тібора Мікловша Поповіча, Джона Ріґеттія, Петра Трохановского і Еву Міхну вшыткы важны моменты історії, котра офіціално зачала перед тридцятёма роками, історії русиньского возроджіня.

Філм говорить о першых кроках русиньского руху на фонї розпаду комуністічной імперії, о першім конґресї, котрый проходив у Меджілабірцях, о першых успіхах, котры Русины зачали досяговати, што было лем потвержінём того, же народ не счезнув.

Воскресеніє народа є окрем розповіданя респондентів обогаченый о цїнны архівны знимкы, філмовы матеріалы із Словацького філмового іншітуту, як і о знимкы з дрону.

Промітаня з бісїдов одбудуть ся 21-го октобра в Клубі Лучніця (Klub Lúčnica) в Братїславі о 18.00 год., 25-го октобра в Театрі Віола (Divadlo Viola) в Пряшові о 18.00 год. і 26-го октобра в Руській Бурсї в Ґорлицях о 15.00 год. Вступ на промітаня є в каждім містї безплатный. О філмі веце можете дочітати ся ту.

 

Петро МЕДВІДЬ, ЛЕМ.фм