11. 9. 2022: Ґрупа приятелїв меншын розшырює своє дїятельство
Про ASN то інтересный моделовый проєкт.
Ґрупа приятелів меншын (Skupina priateľov menšín, SPMN) в Народній радї Словацькой републікы розшырює своє дїятельство о меджінародну сполупрацу із Асоціаціёв про баданя народностей (Association for the Study of Nationalities, ASN).
Нова сполупраца має забезпечіти якостнїшу словацьку леґіслатіву. Аґентуру TASR о тім інформовав єден із основателїв ґрупы, бывшый уповномоченый про ромскы комуніты Абел Равас.
Ґрупа приятелїв меншын конштатує, же з причіны абсенції меншыновой партії в парламентї бракує одборный погляд на леґіслатівны пропозіції з боку меншын. „SPMN мы основали з цїлём укрїпіня якости творїня законів з досягом на меншыны. Залучінём меджінародной сітї ASN до той сполупраці знаме нашы рады і аналізы розшырити о меджінародну добру практіку і іншпіровати діскусію на Словакії з найлїпшыма ідеями з остатнїх частей світа,“ конштатує Равас.
Одборници із SPMN і ASN подля нёго в рамках сполупраці продіскутують веце ключовых тем в области меншыновых прав.
Перша діскусія проходила в середу, 7-го септембра 2022-го року, в Братїславі, участный на ній быв презідент асоціації Флоріан Бібер. Одборници бісїдовали о темах знаня меншын, меншыновій репрезентації і демократізації меншын.
„ASN вже довгы рокы має намагу маповати сітуацію в области меншыновых прав, но теперь першыраз залучіме ся до оцїнёваня леґіслатівного процесу шпеціфічной країны. То про нас інтересный моделовый проєкт, котрый, вірую, буде мати хосен і про шыршу сполочность,“ повів Бібер.
Актівіту Ґрупы приятелїв меншын вітать і уповномоченый влады Словацькой републікы про народностны меншыны Ласло Буковскый. „Тїшу ся, же посередництвом сполупраці з ASN і на Словакію дістануть ся ідеї, котры рушають з меншыновов політіков по цїлім світї,“ высловив ся уповномоченый.
Цїлём Ґрупы приятелїв меншын є перепяти одборників у области меншыновых прав із посланцями Народной рады Словацькой републікы. За веце як рік од свого выникнутя ґрупа вже припомінковала понад штиридцять законів із досягом на жывот народностных меншын на Словакії.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
