11. 9. 2022: У Вігорлатьскім музею буде День традічных ремесел про молодеж
Вігорлатьскый музей в Гуменнім приготовлює на 14-го септембра 2022-го року подію про школьску молодеж з назвов День традічных ремесел.
Як інфомровала Яна Федічова з Вігорлатьского музея, творчі дїлнї традічных ремесел суть початочным проґрамом септембровых подій музея в рамках підпоры ідеї Днїв европской културной дідовизны 2022.
Освітнїй зажытковый інтереактівный проґрам День традічных ремесел є заміряный на презентацію културной дїдовизны традічной ремеселной выробы і народного кумшту реґіону вышнёго Земпліна. Подїя буде проходити в Експозіції народной архітектуры і бываня (сканзен), і є про вшыткы віковы катеґорії школьской молодежи.
Як дале інформовала Федічова, заміром є підпорити ремеселны зручности
дїтей і пробудити в них інтерес о розвиток традічного ремеселного і художнёго потенціалу про утримательну будучность реґіону.
Дїти на події будуть ремеселны фахманы учіти наприклад ткати на короснах, робити із соломов, приучіти ся годны будуть і гончарьству, ковальству, можуть ся научіти як підкути коня, як робити підмальбу на скло, можливость буде і учіти ся різбарьству, а много далшого. Так само будуть дїтям в сканзенї вказаны і рольницькы роботы.
В рамках переглядкы сканзену будуть дїти мати і коментовану презентацію сакралной архітектуры карпатьского реґіону – народной културной памяткы Церькви святого Михаіла Архістратига із 1764-го року з автентічным бароковым іконостасом, вкаже ся їм народна архітектура, добове бываня, добовы ремеселны і польногосподарьскы серсамы.
Подію про школьскы колектівы приготовив Вігорлатьскый музей в Гуменнім як продовжіня довгодобого музейного ціклу обєктового навчаня в музею під назвов Ку коріням, традіціям, цїнностям.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
Фото: www.muzeumhumenne.sk