11. 4. 2019: Споминаня на Осифа Кеселіцю з Енді Варголом

28-го марца 2019-року в Піддукляньскій бібліотецї у Свіднику проходив семінар на тему Жывот і дїло Енді Варгола. Ёго орґанізатором была свідницька Містна орґанізація Русиньской оброды на Словеньску, Піддукляньска бібліотека і ОЗ Про Рутенія.

Споминаный семінар, на котрім брала участь і пріматорка Свідника Марцела Іванчова, быв завершінём проєкту, котрого сучастёв были квізы зналостей в основных школах у Свіднику на тему Енді Варгол і навщіва школярів Музея модерного уменя Енді Варгола в Меджілабірцях. Подія зачала минутов тиха, котров єй участници вздали честь уж небогому знамомому бадателёви Варгола – Осифови  Кеселіцёви, а потім і цїлый семінар быв присвяченый ёго памятцї. Правда, Осиф Кеселіця, уж не міг быти на семінарї, але о ёго виджіню Енді Варгола інтересно розповідала ёго дївка Александра Кеселіцёва. Ярослав Фецуш, председа МО РОС, поінфомовав участників о основных фактах, котры ся учіль і дїти на основных школах. Професіоналный характер цїлій події додав Мартін Цубяк, директор Музею модерного уменя Енді Варгола в Меджілабірцях. На семінарї ся одбыла і поєкція інтересного документу о Енді Варголови, як го видять братя Куцеровы. Оріґіналну і незабытну атмосферу цїлій події придав своїм співом оперный співак Іґор Куцер, котрый заспівав автентічны співанкы матери Енді Варгола в оріґіналнім джезово-опернім спрацованю.

Цїла културно-освітна подія была достойнов презентаціёв жывота і творчости краля поп-арту, Русина Андрія Вархолы – Енді Варгола.

Я. ФЕЦУШ, жрідло: Народны новинкы інфо Русин