11. 10. 2020: Русиньскый музей понукать едукатівны актівности і конкурз про школярїв

Хоць културно-сполоченьскы події суть з причіны пандемії обмеджены, Словацькый народный музей – Музей русиньской културы і в тых днях розвивать свої актівности, котрыма хоче ословити школярїв другого ступня основных школ, а нелем їх.

Про малых і дорослых приготовив едукатівны актівности у своїх просторах, про школярїв другого ступня літературный конкурз. Хоснує при тім выставкы, котры того часу мож в музею відїти.

Конкурз з Ільком Совом

Як музей інформує на своїм офіціалнім фанпейджі на сітї Facebook, школярї ся можуть запоїти до літературного конкурзу під назвов Ілько Сова з Баюсова. Конкурз є споєный із выставков Федора Віца, котра была одкрыта в септемберї і буде єй мож відїти в просторах музея до кінця октобра.

„Федор Віцо є талентованый вытварник. Но тайносткарь. Выдумав жываньского уйка Ільку. Кличе го Ілько Сова з Баюсова. Тот Ілько є на вшыткых ёго кресленых гуморных образках. Зробив з нёго цїлый серіал, котрый є популарный і дорослы го знають. Ілько Сова є старшый, мудрый, підрывачный пан з довгыма баюсами. Но веце о нїм ніч не знаме, а Федор Віцо, котрый го сотворив, нам не хоче о нїм ніч прозрадити,“ пише ся у выголошіню конкурзу.

Школярї мають о Ількови выдумати історію, повіданя , і загнати свій текст до музею. Твір може быти і в стихах. Найгуморнїшы творы будуть оцїнены і, як обіцять музей, Ілько Сова прийде і за найуспішнїшыма домів.

Едукатівны актівности про малых і дорослых

Музей на місяцях октобер і новембер приготовив і коментованы переглядкы выставок, котры теперь мож відїти в ёго просторах, значіть выставкы Владиміра Ґаная під назвов Односины і споминаной експозіції Федора Віца. Проґрам має назву Жебы сьме жыли уменём.

Окрем того, понукать і творчі варштаты. При Ґанаёвій выставцї іде о креслїня сухым пастелом, в припадї выставкы Федора Віца участны можуть здобыти зручности при творїню кресленого гумору і коміксу.

Коментованы переглядкы, як і творчі варштаты робить музей без обмеджіня віку. Едукатівны проґрамы суть приготовльованы про ґрупы од 5-ёх до 20-ёх участных. Веце інформацій о конкурзї і творчіх варштатах мож здобыти на фанпейджі музея на сітї Facebook.

Петро МЕДВІДЬ, лем.фм, жрідло фотоґрафії: СНМ – Музей русиньской културы, языкова управа: ред. АРК в СР.