10. 9. 2022: Чірч хоче збудовати школу. Хотять другый ступень і умелецьку школу
Матерьска школа вже была розшырена.
В русиньскых селах на Словакії суть векшынов два припады. Будь в них є школа, котра каждым роком має менше школярів, або уж в них ани не є школы, кедьже середнїй вік на нашых селах росте, і молоды одходять з реґіону.
В селї Чірч в окресї Стара Любовня є цалком іншый припад. Капаціта основной школы з матерьсков школов уж не старчіть, жебы мати повноцінне фунґованя. Село хоче капаціту розшырити збудованьом школы, што бы ся мало фінанцовати з еврофондів.
Староста села Михал Дідік про аґентуру TASR повів, же мають вже приготовленый проєкт, включно ставебного позволїня. Вытраты рахують на уровни міліона евр.
Хотять другый ступень
Школярї другого ступня мусять теперь доходити до школ в селах околіцї. Подобна сітуація є подля старосты в многых селах Словакії.
„Родічі школярів нашой школы, до котрой ходить коло 80 дїтей на першім ступнї, мають інтерес о повноорґанізовану школу – то значіть першый і другый ступень. Приставбов розшыриме капаціту о сто процент. Выбудуєме три новы класы, але і класы про одборне навчаня про другый ступень,“ говорить староста з тым, же ку тому прибудуть і далшы просторы про школярїв а учітелїв.
„Прибудуєме модерну часть, де буде мати своє місце і основна умелецька школа,“ приближыв планы директор школы Мілан Вархола. Зрдяжіньом другого ступня выникнуть і новы робочі місця, школа хоче дати роботу молодым педаґоґам із села.
Матерьска школа ся вже розшырёвала
Школа в селї Чірч в минулости вже перешла часточнов реконштрукціёв, котра принесла шпорованя енерґій. Но в сучасности їм платбы за електрику наросли о 60 процент.
„То грошы, котры бы сьме могли схосновати цалком іншак,“ конштатовав Вархола з тым, же помочі од державы затля не дочекали ся. Піднятя цїн енерґій подля нёго найвеце буде чути школьска їдалня, котра стравує 140 дїтей і робітників школы.
Вдяка фінанчній дотації в сумі 320 тісяч евр з резорту внутрішнїх справ самосправа перед штирёма роками уж реконштруовала і розшырёвала матерьску школу. Того часу знають мати в матерьскій школї аж 46 дїтей, што є двараз веце, як то было перед розшырїнём. Наперек тому і теперь мають іщі невыбавлены жадости.
Роснутя чісла жытелїв і дїтей село приписує будованю новых арендованых кавртелїв, будованю локаліт на выставбу родинных домів, і потребной інфраштруктуры.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
