10. 9. 2022: Русиністы стрїтять ся на конференції в Будапештї

В днях 15-го аж 18-го септембра 2022-го року главне місто Мадярьска Будапешть стане центром світовой русиністікы.

В тых днях зыйдуть ся в Будапештї науковцї, котры занимають ся русиністіков, але і гостї, котры репрезентують Русинів у окремых державах на меджінародній конференції під назвов Світова русиністіка днесь: вопросы теорії і практікы.

Конференцію орґанізує Русиньскый научный інштітут імени академіка Антонія Годинкы і пленарны засїданя конференції будуть проходити 16-го і 17-го септембра 2022-рго року. Першый день будуть участны годны выслухати рефераты в Салі Калмана Селла, в просторах мадярьского парламенту. Другый день ся конференція перенесе до резіденції Вседержавного русиньского самосправованя.

Як інформовали орґанізаторы, конференцію в пятніцю одкрыє Іштван Шімічко, председа фракції KDNP Парламенту Мадярьска. Слово на одкрытю конференції буде мати так само председа Вседержавного русиньского самосправованя Віктор Крамаренко, як і Михаіл Капраль, директор Русиньского научного інштітуту імени академіка Антонія Годинкы.

В суботу буде конференцію закрывати Віра Ґіріц, посланкыня Парламенту Мадярьска за русиньску народностну меншыну.

На конференції свої рефераты прочітають русиністы із Мадярьска, Словакії, Україны, Сербії і Японії.

Меджі нима суть мена такых вызначных науковцїв, як Валерій Падяк, Володимір Фенич, Михайло Фейса, Михаіл Капраль, Маріанна Лявинець-Угрин, Юлія Дудашова, Кветослава Копорова, але і далшых молодшых а старшых представителїв сучасной русиністікы. Рефераты будуть на темы языка, літературы і історії Русинів.

 

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.