10. 7. 2023: Ожывлены ремесла у Вігорлатьскім музею

Вігорлатьскый музей в Гуменнім у сполупраці з лекторами ремеселных традіцій реґіону вышнёго Земпліна позывають почас лїта 2023-го року до ареалу Експозіції народной архітектуры і бываня (сканзену) Вігорлатьского музею в Гуменнім.

Як інфомровала Яна Федічова з Вігорлатьского музея, і в тім роцї продовжує лїтнїй проґрам ремеселно-фолклорного ціклу традічных ремеселных варштатів і супроводного проґраму з назвов Ожывлены ремесла – Творчі і освітнї події 4.

Творчі ремеселны варштаты, тематічны выставы і супроводный проґрам будуть проходити в ареалї сканзену почас штирёх недїль од 16-го юла до 27-го авґуста. Події будуть проходити в природнім оточіню сканзену, котрый є збудованый як село з початку 20-го столїтя з автентічныма деревяныма хыжами, з традічным выбавлїнём, автентічным заряджінём і ремеселныма выробками при дотриманю традічных выробных поступів і матеріалів, якыма были дерево, глина, вовна, полотно ці метал.

Цікл одкрыє ся 16-го юла, коли спробовати буде мож роботу корытарів, котрых старе ремесло представить Мілан Карля із Снины. Гончарьску дїлню буде мож спробовати 30-го юла, і роботу гончарів одпрезентує Ярослав Лехан з Тополї.

Роботу з полотном і кроснами буде мож приучіти ся 13-го авґуста з Любіцёв Таларовічовов із Снины. В тот день так само буде мож учіти ся ковальске ремесло зо Штефаном Баранчіком із Каменіцї над Цірохов. На кінцю лїта, 27-го авґуста, представлять в сканзенї різбярьску роботу Марія і Ладислав Горватовы з Колоніцї.

В рамках творчіх варштатів про навщівників є приготовленый і проґрам переглядкы сканзену з унікатнов деревянов Церьквов святого Михаіла Архістратига з 18-го столїтя, домами і інтересныма господарьскыма будовами, якыма суть водный млин, традічны сыпанцї і півніцї, як і много далшого.

Музейный проґрам є конціпованый як освітнїй і забавный екскурз до автентічных ремеселных реалій нашых предків з одказом на їх зручность, традічны ремеселны выробкы реґіону і всокочены ремеселны поступы, котры суть частёв културной дїдовизны реґіону.

Петро МЕДВІДЬ, ЛЕМ.фм, языкова і ґрафічна управа: АРК в СР.