10. 6. 2022: Рутенія оцїнена Золотов медайлов Словацькой републікы
По двох роках одкладаня з причіны пандемії Фолклорный ансамбель Рутенія, котрый дїє в Братїславі, одсвятковав 10-ый юбілей свого єствованя премєров нового проґраму з назвов Хырбетом ку горам.
Премєра новой танечно-драматічной інсценації, по котрій слїдовала святочна рецепція із русиньсков забавов, одбыла ся 4-го юна 2022-го року в просторах Култорного дому Дзеркаловый гай в братїславскій містьскій части Петыржалка.
Рутенія святковала з вызначныма гостями
Покровительство над святочным проґрамом з нагоды 10-ой рочніцї Рутенії перевзяла презідентка Словацькой републікы Зузана Чапутова.
На премєру Рутенії пришли вызначны гості із Словакії, але і споза граніць. Участный быв уповномоченый влады Словацькой републікы про народностны меншыны Ласло Буковскый, ґенералный директор Словацького народного музея Браніслав Паніс ці дирекрка Фонду на підпору културы народностных меншын Алена Котванова.
Якбач найвызначнішым гостём споза граніць быв професор Павел Роберт Маґочій з Канады, котрого назва книжкы іншпіровала і творцїв новой танечно-драматінчой інсценації, яка дістала єднаку назву.
На подію пришов і председа Світового конґресу Русинів Штефан Лявинець, державный секретарь сербского Міністерства про людьскы, меншыновы права і соціалный діалоґ Олена Папуґа, членове Світовой рады Русинів за Польщу і Чеську републіку – Андрій Трохановскый і Владислав Гаффнер, представителі Стоваришыня Руска Бурса з Польщі – Наталія Малецька-Новак і Даміан Трохановскый, але і далшы представителї русиньского културно-сполоченьского жывота на Словакії.
Злата медайла про Рутенію
Несподїванка про Фолклорный ансамбель Рутенія пришла по премєрі, кедь на сцену вышли з куртыма приговорами уповномоченый Буковскый і професор Маґочій.
Уповномоченый при нагодї 10-ой рочніцї удїлив ансамблю Злату медайлу Словацькой републікы. Медайла є „узанём і подякованём за роботу, котру ведучі і членове колектіву зробили про розвиток културы і фолклору Русинів на Словакії“.
Злата медайла Словацькой републікы є нагородов Уряду влады Словацькой републікы. Уповномоченый про народностны меншыны єй звыкне од 2017-го року удїлёвати народностным інштітуціям, колектівам або особам, котры дїють в народностнім русї.
Хырбетом ку горам
Інсценація Хырбетом ку горам была за порядком четвертов премєров Фолклорного ансамблю Рутенія, котрый выникнув у Братїславі в 2010-ім роцї. Думку на ісценацію принїс Петро Штефаняк, котрый ансамбель веде од выникнутя.
Танечну режію і драматурґію робив Штефаняк із Славоміром Ондейком, сценарь і режію робив Петро Медвідь. На сценї мож в представлїню відїти і Дїтьскый фолклорный колектів Ґайдошік. Главну роль Николая Бескида – ґрекокатолицького священика, патріота і будителя, котрый інсценаціёв проводить помеджі танечны выступы, грає актор Володимір Чема.
Ансамбель Рутенія, котрый є на сцені уж 12 років, приготовлює з новов прємров турне і на выході Словакії.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
