10. 12. 2019: Місто Меджілабірцїі вже має вебсайт і по русиньскы

Місто Меджілабірцї в остатнїх днях спустило свій офіціалный вебсайт з новым дізайном. Прибыла і русиньска мутація. Інформовала о тім аґентура TASR.

Вебсайт має фунґовати подля сучасных трендів і технолоґій, а так само має быти в згодї з платнов леґіслатівов. Про аґентуру то потвердила Моніка Віціанова із Містьского уряду в Меджілабірцях.

 

Прибыла русиньска верзія

Меджілабірьска самосправа подля Віціановой слов вырїшыла змінити дізайн сайту із 2008-го року, окрем модернізації, і з причіны факту, же обсяг не дотримовав правила приступность вебсайту з погляду припису Міністерства фінанцій Словацькой републікы.

„Далшов причінов было вытворїня русиньской мутації сторінкы, кедьже місто Меджілабірцї находить ся в списку міст і сел в смыслі наряджіня влады ч. 221/1999, котрым выдає ся список сел і міст, якых обчане Словацькой републікы, котры належать ку народностній меншынї, творять найменше 20 процент населїня,“ повіла Віціанова.

Додала, же про тоты села і міста платить обовязок публіковати важны інфомації на офіціалнім вебсайтї коло державного языка і в языку народностной меншыны, в припадї Меджілаборець в языку русиньскім.

Словацька верзія сайту є того часу наповнена приблизно на 90 процент, русиньска ся поступно буде доповнёвати, бо того часу приготовлюють ся переклады.

 

Наповнїня далшого обовязку

Меджілабірцї тым кроком наповнили далшый обовязок, котрый має місто на основі того, же в нїм жыє потрібна кількость Русинів, жебы мож было в уряднім контакті хосновати і русиньскый язык.

Того часу мають, окрем того, Меджілабірцї по русиньскы таблічкы, котры означуть зачаток і конець міста коло драгы, на желізнічній штації є і русиньске означіня і Містьского і Окресного уряду, Русины можуть по свому чітати написы і оголошіня на містнїй бензиновій помпі Slovnaft ці в супермаркеті TESCO.

Хоць суть Меджілабірцї єдине місто на Словакії, де жыє над 20 процент Русинів і могли бы по русиньскы мати означены і уліцї, дотеперь ся там означованя уліць не реалізовало.

 

Вебсайт має по русиньскы і край ці окресный уряд

Давати своїм жытелям важны інформації і в языку меншыны має як обоязок кажде село і місто, де творить меншынова комуніта мінімално 20 процент населїня. Значіть, русиньскы верзії вебсайтів із основныма іфнормаціями бы мало мати і кажде село, де жыє мінімално 20 процент Русинів, но реално то села не роблять.

Русиньску мутацію свого офіціалного сайту, хоць му то закон не каже, має в основній верзії і Пряшівскый самосправный край. Спустив го у 2016-ім роцї. Tот рік зачав давати на своїм сайтї інформації по русиньскы і Окресный уряд Меджілабірці, бо Меджілабірці подля кількости приголошеных Русинів є і найрусиньскішый окрес на Словакії. Ку Русинам ся в окресї голосить понад 60 процент жытелїів.

Петро МЕДВІДЬ, ЛЕМ.фм