1. 7. 2022: Будут однавляти памятникы. В ґорлицкє трафит 271 тис. зл

Обшыр ґорлицкого повіту є евенементом на загальнопольску скалю. Ниґде веце неє такого нагромаджыня історичных перлин сакральной архітектуры, што находят ся на списку світовой спадковины UNESCO.

Самоуряд Малопольского Воєвідства каждого рока передає середкы цілю підперти консерваторскы роботы підниманы опікунами памятниковых обєктів в реґіоні. В роках 1999-2022 з буджету Малопольского Воєвідства в формі дотаций на такы роботы передали веце як 77,7 млн зл.

Того рока признали разом 108 дотаций на суму 5,2 млн зл. Вельо з того трафило до ґорлицкого повіту, тіж на Лемковину.

Вельокультурова обшыр

«То великы квоты, што передаєме до вшыткых тых, котры роблят вынятковы річы в своіх самоурядовых ци орґанізацийных спільнотах» – бесідувал Вітольд Козловскій вчас вручаня самоурядовцям і диспонентам памятників символичных чеків з квотами перезначеныма на ріжны роботы. «Днешня подія є доказом політикы зрівноваженого територияльні розвитку, котру ведеме, што має служыти жытелям Малопольщы» – додал.

На обшыри ґорлицкого повіту в найблизшым часі проведут роботы за веце як 250 тис. зл. Єдным з бенефіциєнтів є римокатолицка парохія покровы Божой Матери Неустанной Помочы в Устю Рускым. За 15 тис. зл зроблят консервацию плащаниці, што находит ся в лемківскій грекокатолицкій церкви покровы св. Параскєвы в Квятони.

«Плащаниця уж трафила до консерваторской працовні в Новым Санчы» – бесідує Ян Гыра, провідник по церкви в Квятони, што находит ся на списку UNESCO. «Надію ся, што роботы закінчат згідні з пляном, значыт осіню того рока. Грошы, што сме достали, барз тішат, але старчат лем на само полотно. Дальше треба буде іщы зробити раму» – додає.

Не лем церкви, але і стародрукы

Інча памятникова святыня то костел покровы св. Михала Архангела в Бінаровій (тіж на списку UNESCO). Гын за 20 тис. зл зроблят консервацию заолтарной шафы з ковальскым окутьом з XVI ст.

«Мусиме памятати, што наш повіт то досправдовый культурный і реліґійный котел» – підкрислят Ядвіґа Вуйтович, воєвідска радна. «Тото спричынят, што фундушы, котрых диспонентом є соймик, передаваны сут на роботы при ріжных сакральных обєктах. То не лем костелы, але і церкви ци напр. синаґоґа в Бобовій, але і важны діяня, такы як консерваторскы роботы при церковных стародруках» – продолжат.

Тоты послідні веде Єпархіяльный Осередок Православной Культуры «Ельпіс». Маршалківскій уряд передал на речену ціль 15 тис. зл.

Дальшы роботы ведены будут в памятниковых храмах на обшыри ґмін Санкова, Устя Рускє, Бобова. Продолжана буде м.ін. робота при консервациі іконостату в церкви св. Параскєвы в Новици.

Наталія МАЛЕЦКА-НОВАК, ЛЕМ.фм. Фот. okp-elpis.pl