1. 6. 2021: В Краснім Бродї посвятили новый літурґічный простор

В недїлю, 30-го мая 2021-го року, в Краснім Бродї, коло розвалин стародавного монастырьского храму отцїв василіянів, проходив архієпархіалный одпуст з нагоды праздника Сошествія Святого Духа. Інформовав о тім Інформачный центер Пряшівской архієпархії.

В історічнім путницькім місцї русиньскых ґрекокатоликів быв на одпустї главным служытелём пряшівскый ґрекокатолицькый архієпіскоп і метрополіта Йоан Бабяк. Вєдно з ним служыли меджілабірьскый протопресвитер Йоан Блашко, протоігумен Чіну святого Василія Великого Володимір Юрій Седлачек, як і далшы священици.

Тогорічный одпуст быв вынятковый тым, же быв повязаный із посвячінём нового ектсерьєрового літурґічного простору.

По прівітаню метрополіты отцём Методіём Біланчіком, ЧСВВ, слїдовало посвящіня новых просторів і архієрейска літурґія. На кінцю ся владыкови подяковав протоіґумен за посвячіня і участь найвысшого єрархы ґрекокатоликів на Словакії на одпустї. Владыка Йоан зясь подяковав василіянам, же выбудовали новый достойный літурґічный простор, і же ся старають о тот путницькый центер.

Наперек тому, же одпуст мусив проходити при дотриманю епідемічных наряджінь, участь на нїм брало велике чісло вірників з околіцї, але і з оддаленїшых парохій.

Пополюдне архієпіскоп навщівив у допроводї далшых священиків у Выраві отця Василя Дацея, тітуларьного архідекана.

Отець Дацей є служобно найстаршым священиком Пряшівской архієпархії. В марці святковав 65-ту рочніцю рукоположіня. Служыв на парохіях у Высланцї, Славківцях, Підгородї ці в Гелцманівцях. Як родак з Выравы є на пензії у містнім центрї соціалных служеб.

Петро МЕДВІДЬ, ЛЕМ.фм, ґрафічна і языкова управа: ред. АРК в СР. Фотоґрафії: Теодор Марош Кость, ЧСВВ.