1. 5. 2019: Мікловш Шолтес: „Мы Русинам в припадї потребы поможеме.‟

„Покля Україна не узнавать (…) лоялну русиньску комуніту, потім єй мадярьска влада в припадї потребы прийме і поможе Русинам за граніцями,“ повів на торжественній події посвячіня і одкрытя Русиньского ґрекокатолицького центру державный секретарь про вопросы реліґійных і націоналных односин Канцеларії премєрміністра Мадярьска Мікловш Шолтес.

Новый русиньскый центер быв одкрытый в районі Йовжа в містї Дебрецин у пятніцю 26-го апріля 2019-го року. „Сьме єдина меншына в Мадярьску, котра може теперь гордити ся такым центром,“ повіла про редакцію Віра Ґіріц, представителька Русинів у мадярьскім парламентї. Центер посвятив владыка Філіп (Кочіш), архієпіскоп гайдудорозькый і метрополіта Мадярьска. Мікловш Шолтес на події припомянув, же меджі першыма Мадярьско узнало незалежну Україну і скрітіковав закон, котрый у четверь прияла Верьховна рада Україны як неприятельный.

 

Меджі першыма сьме узнали Україну

Шолтес припомянув, же по розпадї Совєтьского союзу Мадярьско меджі першыма узнало незалежну Україну, підтримало їй намагы о меджінародну інтеґрацію, зробило гранічны переходы і дало гуманітарну поміч, кедь требало і не робило різніцю меджі Мадярями, Русинами або Українцями на Українї.

„Но теперь, жаль Богу, зажываме, же русиньска народность не є узнана за окрему народность і зродив ся закон (на Українї, позн. редакції), котрый є цалком неприятельный,“ повів далше Шолтес, котрый підкреслив, же тот закон не піде лем проти великой російской меншыны, але дотулять ся і Мадярів, Булгарів, Румунів, Русинів, Словаків і Поляків.

Шолтес так ясно скрітіковав новый Закон о функціонованю україньского языка як державного языка, котрый у четверь 25-го апріля 2019-го року прияла Верьховна рада Україны, і котрый під санкціями запроваджать скоро у вшыткых областях жывота лем україньскый язык. Державный секретарь додав, же є неприятельне, жебы сусїдня держава, котра має тугу по европскій інтеґрації, до такой міры діяла проти народностей.

 

Маєме унікатны односины з меншынами

Мікловш Шолтес на події далше повів, з одкликанём ся на комуніту Русинів, же їх влада надвязала в поперенїх восьмох роках унікатны односины з меншынами, котры суть допроваджаны унікатнов сістемов підпоры, яка має свої резултаты в области културы, самосправы і церьковных односин. Влада підпорила лем будованя нового русиньского центру сумов 39 міліонів форінтів, што є понад 120 тісяч евр.

Петро Медвідь, лем.фм, жрідло фотоґрафії: gorogkatolikus.hu.Звыразнїня писма зроблене редакціов АРК в СР.