1. 12. 2022: Другым віцепріматором Пряшова став Русин – Петро Крайняк

Місто Пряшів по октобровых комуналных вольбах вже має в урядї нового пріматора Франтішка Ольгу, а новый склад містьского заступительства уж має за собов і перше робоче засїданя.

На посадї другого выцепріматора быв потвердженый Петро Крайняк, котрый є познатый межі Русинами з нашого возродного руху. Ёго стрыком є отець Франтішек Крайняк, ініціатор перекладів русиньскых літурґічных текстів, в русиньскім русї довгодобо анґажує ся і ёго отець Петро Крайняк старшый, за професійов правник.

Новый другый віцепріматор абословав Середню лїсницьку школу в Пряшові. По закінчіню основной воєньской службы продовжовав штудовати на Ґрекокатолицькій Теолоґічній факултї Пряшівской універзіты в Пряшові.

Пять років учів на основній школї в селї Свинія. В роках 2012 аж 2013 робив на Урядї уповномоченого влады Словацькой републікы про народностны меншыны в Братїславі. В роках 2016 аж 2020 быв державным секретарём Міністерства школства, наукы, баданя і шпорту Словацькой републікы.

На тій посадї намагав ся, жебы школьске навчаня русиньского языка розшырило ся в нашых реґіонах.

Од 2010-го року без перервы є посланцём містьского заступительства в Пряшові за волебный округ Соливар, Сольна Баня, Швабы. В роках 2013 аж 2017 быв і посланцём Пряшівского самосправного краю.

Од початку існованя мултіетнічной партії Most-Híd, основаній на обчаньскім прінціпі, быв їй актівным членом і фунцкіонарём. По злучіню мадярьскых політічных партій, включно Most-Híd, до єдного субєкту SZÖVETSÉG – ALIANCIA, став членом той партії, в рамках платформы Most-Híd.

Петро Крайняк окрем іншого є і публіцістом. В реґіоналній, народностній і церьковній пресї публіковав понад 200 статей а выдав штири властны публікації.

Довгы рокы быв актівным і в русиньскім русї а в русиньскых орґанізаціях. Так само є знамый тым, же му залежыть на сохранїню гробів вызначных русиньскых особностей, быв при неєднім одкрываню памятных табліць вызначным Русинам, быв і їх ініціатором.

В рамках меджінародной научной конференції з назвов 20 років высокошкольской русиністікы, яка проходила у 2018-ім році в Пряшові, Петро Крайняк быв, окрем іншых, нагородженый Преміёв Кіріла і Мефодія за розвиток русиньского языка.

Петро МЕДВІДЬ, ЛЕМ.фм. Ґрафічна і языкова коректура: АРК в СР.