1. 10. 2019: В Ужгородї засїдав Русиньскый културолоґічный клуб

28-го септембра 2019-го року в конференчній салі Центра култур народностных меншын Закарпатя в Ужгороді проходило засіданя членів Общественной орґанізації Русиньскый културолоґічный клуб.

Як інформовав голова орґанізації Юрій Шиповіч, засїданя было роздїлене на дві части – робочу і семінар присвяченый юбілеям русиньскых діятелїв Александра Павловіча, котрого 200 років од народжіня сьме собі недавно припомямули, і Евменія Сабова, од котрого народжіня минать 1-го октобра 160 років.

 

Обговорили планы на слїдуючій період

В першій части участны выслухали інформацію, котру подав Юрій Шиповіч о реґістрації Русиньского културолоґічного клубу.

Як далше голова орґанізації пише, на засїданю обговорили і пропозіції лоґотіпу, котры были зроблены Маріаном Токарём, якый є і заступником головы орґанізації, і Ярославом Бланарём. Рїшіня о тім, яка буде офіціална верзія знаку орґанізації участны переложыли на слїдуюче засїданя.

Члены, окрем того, встановили напрями роботы свого клубу, зробили комісії і обговорили план роботы на слїдуючій період, кінця 2019-го і зачаток 2020-го року.

 

Семінар присвяченый будителям

В другій части, як уж было спомянуто, проходив семінар на тему Євменій Сабов і Александер Павловіч у народній памяти.

Із своїма лекціями выступали Юрій Шиповіч, далше Юрій Продан, котрый є головов Закарпатьского областного научно-културолоґічного общества  Александра Духновіча, доцент Ужгородьской народной універзіты (УжНУ) Маріан Токарь і докторант Катедры політолоґії і державного управлїня УжНУ Михаіл Зан.

„Окремов честёв про членів клубу была навщіва засїданя ведучой оддїлїня Карпатика Научной бібліотекы УжНУ Марії Чорій, котра зробила про участників префайну выставку книжковых фондів, котры дотуляють ся даной темы,“ інформовав Шиповіч.

Тот участным представив і свіжу публікацію під назвов „Алманах днешньої русинської літературы‟, котрый быв выданый Русиньскым културолоґічным клубом вєдно із Закарпатьскым областным научно-културолоґічным обществом Александра Духновіча. В алманаху мож найти найновішы творы сучасных русиньскых прозаіків, поетів і драматурґів із Підкарпатя.

Петро МЕВІДЬ, ЛЕМ.фм, зрой фороґрафії: Юрій Шиповіч