9. 9. 2018: Юбілей писателькы русиньской душы Марії Ґіровой

Марія Ґірова, котра днесь жыє у Снинї, народила ся 11. септембра 1943 в селї Руське, котре впало за жертву Стариньской гати.

Довгорічна і актівна културна діятелька в русиньскім возроднім русї, русиньска поетка і дописователька русиньской пресы і розгласового высыланя про Русинів, основателька співацькых колектівів (Стащінчанка, Старинчанка, Снинчанка, Дубравка, Яворина), авторка многых літературных і фолклорных проґрамів, членка Сполку русиньскых писателїв Словеньска, председкыня Окресной орґанізації у Снинї Културно-освітнёго общества Александра Духновіча, бывша предсекыня Окресной орґанізації в Снинї Русиньской оброды на Словенську, співачка і декламаторка.

Свої поезії публіковала в русиньскых періодіках: Народны новьнкы, Русин, Інфо Русин, Русиньскый народный календарь, Русиньскый літературный алманах. У 2002 роцї єй поезія вышла у зборнику Тернёва ружа, у 2008 роцї Марії Ґіровій-Васьковій вышов зборник поезії під назвов Родне знїздо, де є надруковано выше 50 прекрасных поетічных творів, меджі котрыма не хыблять спомины на родне село.

З нагоды юбілею желаме нашій юбілантцї міцне здоровя, велике родинне щастя, красны выслїдкы у єй далшім културнім діятельства і надієме ся, же нас потїшыть іщі даякым зборником поезії.

-акуз-, жрідло: НН Інфо Русин, Народны новинкы Русинів Словакії