9. 4. 2020: Проба пред повселюдным списком в 2021 р.

В 16-ох польскых місцевостях зачало ся пробне повселюдне списуваня. Зо взгялду на безпеку проходит оно з вылучыньом безпосереднього контакту, выключні через телефон або інтернет.

Єст то другє пробне списуваня перед нацийональным повселюдным списуваньом в Польскій Республиці, якє пройде в 2021 році. Хто з выбраных місцевости не спише ся сам через інтернет, товды задзвонит до него консультант. В баданю даваны сут звіданя про родинны реляциі, мешканя та дрібницьово про особовы даны. Появляют ся два звіданя про нацийональніст (нацийонально-етнічну приналежніст). Кєд дахто чує, што ідентифікує ся з двома нацийональныма соспільностями, може так ся записати, выбераючы в каждым звіданю по єдній нацийональности. Кєд ні – в другым звіданю мусит выбрати позицию, котра неґує приналежніст до другой нацийональности. В примірі звіданя о язык, котрый хоснує ся дома, мож выбрати одповід «польскій і інчый як польскій» або «выключні інчый як польскій». В обох примірах треба найти на списку даный язык, а кєд го неє, то записати своє окрисліня языка. Детальный опис списовых звідянь доступный єст на сайті spis.gov.pl.

Наталія МАЛЕЦКА-НОВАК, ЛЕМ.фм

(Публікуєме в оріґіналї – лемківскім варіантї русиньского языка.)