9. 4. 2018: Родак з підкарпатьского Виноградова став єпіскопом у Ніредьгазї

Папа римскый Франциск 7-го апріля 2018-го року меновав отця Авела Сочку із Чіну святого Василія Великого за єпархіялного єпіскопа Ніредьгазькой єпархії Мадярьской ґрекокатолицькой церькви. Сочка быв апостольскым адміністратором єпархії од 2015-го року. Быв і протоіґуменом василіяньской Провінції святого Штефана в Мадярьску.

 

Народив ся Авел Антал Сочка 24-го септембра 1972-го року у Виноградові. По закінчіню середнёшкольской освіты абсолвовав богословскы штудії в Будапештї. У 1995-ім роцї вступив до Чіну святого Василія Великого в Мадярьску. Вічны обіты мав у 2001-ім роцї, в тім самім роцї быв і рукоположеный на священика гайдудорозькым єпіскопом Сілардом Керестешом.

 

У 2008-ім роцї быв отець Авел Сочка капітулов выбраный за протоіґумена споминаной провінції, душпатырьску роботу выконовав у Будапештї і в путницькім місцї Маріяповч. В роцї 2016 быв знова выбратый за протоіґумена.

Од року 2015 быв призначеный за апостольского адміністратора Ніредьгазькой ґрекокатолицькой єпархії sede vacante. Од того часу, хоць без єпіскопского рукоположіня, быв отець Авел Сочка, ЧСВВ, членом Рады єрархів Мадярьской ґрекокатолицькой церькви, котра є метрополітнов церьквов.

 

Єпархія в Ніредьгазї была зряджена 20-го марца 2015-го року. То было повязане із выникнутём метрополітной церькви. Екзархат у Мішколцї быв втогды підвышеный на єпархію і Гайдудорозька єпархія была підвышена на архієпархію, причім центром архієпархії став Дебрецін.

 

Головов архієпархії є архієпіскоп і метрополіта Петер Філіп Кочіш, єпархом в Мішколці є владыка Атаназ Орос. Владыка номінант Авел Сочка буде першым єпархом Ніредьгазькой єпархії.

 

П. М.