9. 4. 2016: У словацькім парламентї є офіціално єден Русин

По марцовых парламентных вольбах має Словакія нову владу і посланцї Народной рады Словацькой републікы вже засїли до своїх кресел і роздїлили ся до окремых парламентных выборів. Офіціално є на сайтї словацького парламенту єден посланець, котрый собі записав русиньску народность. Є ним Миколай Крайковіч, котрый кандідовав за соціалнодемократічну партію SMER-SD премєра Роберта Фіца.

Крайковіч кандідовав із 63-го місця і до парламенту ся з того місця не дістав, кідьже ёго партія здобыла лем 49 кресел. По вытворїню коалічной влады многы зволены депутаты ішли до владных функцій, припадно до іншых функцій на міністерствах. Такым способом до парламенту одкрыла ся путь незволеным кандідатам. Так до парламенту дістав ся і Миколай Крайковіч, котрый як єдиный посланець в сучаснім словацькім парламентї пише собі русиньску народность.

Миколай Крайковіч народив ся 13-го апріля 1968-го року. Походить зо села Вапеник в окресї Свідник, в котрім быв єден час і старостом. Выштудовав Высоку школу міджінародного бізнісу в Пряшові. У парламентї сидїв два цїлы функчны періоды першой і другой влады Роберта Фіца (рр. 2006 – 2010 і 2012 – 2016) і єден скороченый функчный період за влады Іветы Радічовой (рр. 2010 – 2012), котрый скінчів передчасныма парламентныма вольбами.

В минулім функчнім періодї мав Крайковіч найвеце служобных загранічных путей на Україну, де вецераз брав участь як позорователь на вольбах. Словацькы медії го означіли за єдного із найменше актівных посланцїв парламенту без єдиной леґіслатівной пропозіції ці позмінюючой або доповнюючой леґіслатівной пропозіції.

Крайковіч є у тім функчнім періодї членом Выбору Народной рады Словацькой републікы про земледїлство і жывотне оточіня і  Окремого выбору Народной рады Словацькой републікы на контролю діятельства Воєньской беспекы.

П. М.