9. 12. 2024: Літературный фонд нагородив Маріяна Марка за цїложывотне дїло. Нагородженый быв і актор ТАД Євґеній Либезнюк.

В понедїлёк, 9-го децембра 2024-го року, Літературный фонд (Literárny fond) передавав нагороды за цїложывотне дїло і вырочны нагороды в области радія, театру, телевізной творчости і забавного уменя.

Як інформовала аґентура TASR, особности театралной, дабінґовой, радіёвой, телевізной і театролоґічной творчости собі оцїнїня перевзяли в Палаці Зічія в Братїславі. Председа комітету Секції про творчу роботу в области радія, театру і забавного уменя Светозар Спрушаньскый в приговорї на святочній подїї повів, же за попередню сезону удїлили 16 нагород за цїложывотне дїло, 24 вырочных нагород і 98 премій.

Меджі нагородженыма суть і директор Театру Александра Духновіча (ТАД) Маріян Марко (на фотцї влїво), а член драматічного колектіву ТАД Євґеній Либезнюк (на фотцю вправо). Марко дістав нагороду за цїложывотне дїло. Либезнюк собі перевязв вырочну нагороду за роль Ромула Великого в інсценації з єднаков назвов, як і за роль Поцца в пєсї Чеканя на Ґодота.

Якраз в пєсї Ромул Великый на сценї Театру Александра Духновіча грають обидвоми нагороджены.

Маріян Марко (р. 1962) почінав в аматерьскім драматічнім колектіві Думка в Кошіцях. У 1983-ім роцї наступив як елев драматічного колектіву втогдышнёго Україньского націоналного театру в Пряшові, днешнїй русиньскый ТАД. В роках 1984 аж 1988 быв посланый на штудії акторства до Кієва, де закінчів Кієвскый державный інштітут театралного уменя Карпенка-Карого. По штудіях став рядным членом драматічного колектіву. У 1999-ім роцї быв выменованый до функції директора театру, і в нїй є доднесь.

Почас свого професійного жывота сполупрацовав з аматерьскым драматічным колектівом в Меджілабірцях, учів на конзерваторії, быв основателём меджінародного театралного фестівалу Карпатфест ці членом порадного орґану директора Словацького народного театру в Братїславі. Є так само довгорочным председом журї на декламачнім конкурзі Духновічів Пряшів, котрый орґанізує Русиньска оброда на Словенську.

В януарї того року презідентка Словацькой републікы Зузана Чапутова удїлила Маріянови Маркови Прибинів крест ІІ. класы за вынятковы заслугы о културный розвиток Словацькой републікы.

Петро МЕДВІДЬ, ЛЕМ.фм, языкова і ґрафічна управа: АРК в СР.

Фото: TASR.