9. 12. 2022: Гелена Ґіцова-Міцовчінова: І співам і плачу (2. часть з припралёваной книжкы з таков самов назвов)

Гелена Ґіцова-Міцовчінова

І співам,  і плачу (2.)
Каждый або не каждый

свій жывот собі важыть

так, як ёго сумлїня каже

добры і планы скуткы

до узлика ці узла звязати,

бо на страшнім судї

покровитель

розвяже

грїшным грїхы

хоче указати

а праведных позве

до божой благодати.

 

***
Ой, Боже, мій Боже,

хто же мі поможе

мої дражкы зміряти,

кедь я пишу

до узкых хоць

рівных рядочків

а до них наливам

воду быстрин

і чісту воду з ярочків,

малюю з лукы

квіточкы до пукеты

і ружу в загородцї

моёй теты.

А на чістый

папірь переписую

бы-м на одпустї

з іконы

Матери Божой

з монастыря

прочітала,

чом у моїм сердцї

з болести і горя

так пекучо.