9. 12. 2020: Русенко і Маестро – «Терочка» выконала лемківскій гымн

Ден Русинів 2020 упамятнил своім онляйн выступом і молодіжный ансамбль Руской Бурсы в Ґорлицях – «Терочка». Слідом славной «Лемковины» з Білянкы, в суботу, 5. грудня/децембра 2020 р., выспівал премєрово лемківскій гымн «На Лемковині».

То іщы єдна акция, орґанізувана з нагоды Дня Русинів в Польщы, котрый каждого рока проходит в памят фльориньского віче.

Покріпляти нарід

Як раз Ден Русинів был найліпшом нагодом на тото, жебы ансамбль «Терочка» зробил премєру выконаня пісні «На Лемковині». На жаль, з причыны продолжаючой ся пандеміі премєрове выконаня одбыло ся лем онлянй в сіти Facebоок і на сайті YouTube. Премєрове высыланя было о 9.00 год.

В награню взяли участ члены ансамблю «Терочка», якы своі поєдны выступы награли дакус скорше, жебы пізнійше были они зъєднаны і припущены до єдной відеореляциі. Ґрупу зрыхтувал артистичный кєрівник ансамблю Андрий Трохановскій. Ґратуляциі доброго выконаня склал сам Маестро Ярослав Трохановскій.

«На Лемковині» то вершуваный твір написаный Учытельом – Іваном Русенком. В пізнійшых роках, коли Лемкы потрібували міцного покріпліня іх тужынь, музику до того верша скомпонувал Ярослав Трохановскій, якій скоро ввюл тот дальшый патріотичный твір до репертуару Ансамблю Пісні і Танця «Лемковина». Пісня скоро была признана через нарід за лемківскій гымн. Звучала всядиль там, де зо своіма концертами ходил білянчаньскій ансамбль, на рідных землях, але так само на чужыні і в ЗША, хоц не все была згода на тото комуністичной цензуры.

«Терочка» то молодіжный ансамбль Стоваришыня Руска Бурса в Ґорлицях.  Основаный был в 2008 р. Андрийом i Галином Малецкыма. Потім з ансамбльом робили Сусана Яра і Славко Трохановскiй. Од 2014 р. ведіня ґрупы было поручене Андрийови Трохановскому, якій надале єй успішно розвиват.

Ґрупа фурт дає штораз то більше концертів, а головні прикрашат подіі, якы проходят в Рускiй Бурсi, але так само концертує на інчых лемківскых подіях в Польщы, Словациі, Украіні, Хорвациі ци Сербіі. В репертуарі, окрем народных, має і авторскы русиньскы співанкы, в тым як раз патріотичный

репертуар. Ансамбль в 2016 р. выдал платню з тринядцетьома творaми. Од деякого часу попри старшій «Терочці» діє діточа ґрупа «Міні Терочка».

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)