9. 1. 2025: Різдвяна «Бесіда» з календарьом на Новый 2025 Рік

Традицийно в посліднім місяци рока трафил до нашых рук як раз остатній номер часопису «Бесіда» за 2024 р. – пресового орґану Стоваришыня Лемків. То ч. 6 (201) за місяці листопад/груден 2024 р. Різдвяно-новорічне чысло приносит нам традицийно «Календар Бесіды на 2025 рік», якій радо вішаме в нашых хыжах.

Теперішній номер витат нас уж святочно-новорічно. При нагоді богатый є в реляциі з подій, якы проходили осіню. В посліднім выданю за 2024 р. прочытаме м.ін. статі:

• Петро Медвідь, В Пряшові одбыла ся медженародна конференция карпаторусиністикы;
• Севериян Косовскій, Юілей Андрия Копчы – одданого ведучго Стоваришыня Лемків;
• Андрий Копча, Спізненый ювілей…;
• Андрий Ковальскій, Ластівочка з лемківском пісньом на Балканах;
• Петро Медвідь, ХІІ Бієнале Лемківской/Русиньской Культуры;
• Андрий Ковальскій, ХVII Стрічы Трьох Поколінь з Лемківском Культуром; 
• Севериян Косовскій, Талергофскы Упамятніня.

Можеме тіж детальнійше запознати ся з цілым шором подій, якы проходили в нашым русиньскым світі – о тым доносит част «Новины, не новины – не лем з Лемковины». Не бракує і выімків з інчых часописів і ґазет, што тыкают нашых справ.

Но і найважнійше – послідня «Бесіда» за 2024 р. є з додатком. То славный і уж культовый «Календар Бесіды» – тепер уж на 2025 р., якій найдете в середині. Окрем церковных праздників позначыли сме в календари на будучый рік і наше нацийональне свято – Ден Русинів Польщы, якій припадат на 5. грудня/децембра.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)