8. 9. 2021: Меншыны стрїтили ся з делеґаціёв Рады Европы

Остатнїй моніторінґ Рады Европы на Словакії проходив у 2014-ім роцї.

В днях 6-го аж 10-го септембра 2021-го року є на навщіві Словакії делеґація порадного комітету Рады Европы ку Рамковому договору о охранї народностных меншын.

Делеґація робить моніторінґ в контекстї 5-го ціклу моніторованя імлементації Рамкогового договору. В складї делеґації суть Алёна Ґроссу з Молдавії, Александра Кастро з Портуґалії і Мікко Пуулмалаінен з Фінландії.

5-ый моніторінґ на Словакії

Словакія Рамковый договор на охрану народностных меншын підписала у 1995-ім роцї і остатнїй моніторінґ проходив в роцї 2014 з тым, же становиско комітету з моніторінґу, котре обсяговало рекомендації про Словацьку републіку, якы выходили з того, на што меншыны вказали як проблематічне, было публіковане в роцї 2015.

В рамках 5-го моніторінґу в Словацькій републіцї была стрїча з меншынами доїднана на 6-го септембра в Братіславі і 7-го септембра в Пряшові. На стрїчі в Пряшові брали участь ромска, русиньска і україньска народностна меншына. Обговорити ся мав період од остатнёго моніторінґу.

Обговорили ся найважнішы темы

За Русинів на стрїчі были участны Люба Кралёва, директора Словацького народного музея – Музея русиньской културы (СНМ-МРК), Яна Трущіньска-Сива, так само із СНМ-МРК, Зденка Цітрякова і Михал Павліч із Інштітуту русиньского языка і културы Пряшівской універзіты в Пряшові, як і Петро Медвідь, представитель Русинів у Выборі про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.

Делеґацію Рады Европы інтересовали главно темы условій высокошкольскых штудій языків і култур споминаных меншын, условія народностностного школства обще, ці підпора розвитку културы народностных меншын на Словакії.

Бісїда была і о фунґованю народностных музеїв споминаных меншын.

На стрїчі участны обговорили і тему, яка є повязана з приготовлїнём закона о поставлїню народностных меншын, кедьже делеґація інтересовала ся, в чім бы меншынам даный закон мав помочі.

Оцїнка з 5-го моніторінґу бы подля слов Алёны Ґроссу, котра вела стрїчу з меншынами, мала з боку порадного комітету быти готова в октобрї того року.

Петро МЕДВІДЬ, ЛЕМ.фм, ґрафічна і языкова управа: ред. АРК в СР