8. 6. 2022: Префект Конґреґації про восточны церькви навщівив Солотвино

Першый маёвый тыждень 2022-го року на пятьднёву навщіву Румунії пришов префект Конґреґації про восточны церькви кардінал Леонардо Сандрі. Почас нёй пришов і до Солотвина в Закарпатьскій области Україны.

Як інформовала україньска редакція порталу Vatican News, Сандрі в Румунії навщівлёвав штруктуры і орґанізації, котры помагають тым, хто втїкать з Україны з причіны войны. Окрем поздоровлїнь і вдякы од Папы рисмкого Франціска, префект восточной конґреґації принїс до Румунії і матеріалну поміч.

Рано 3-го юна гость з Ватікану пришов до міста Сіґет, де стїрчав ся з представителями штруктур, якы принимають біженцїв, але і з тыма, котрым ся помагать.

Пак кардінал Сандрі перешов румуньско-україньску граніцю і в просторах Румуньского конзултату в містї Солотвино одбыла ся стрїча з представителями реґіоналной і містной самосправы, як і з представителями духовенства, меджі котрыма быв і апостольскый адміністратор Мукачівской ґрекокатолицькой єпархії владыка Ніл Лущак.

Як інофрмовав портал Vatican News, меджі тыма, котры обговорили ся на тій стрїчі, была і гуманітарна підтримка про 400 тісяч особ, котры суть внутрїшнё переселены, значіть, котры пришли на Підкарпатя і походять з областей, де проходять боёвы дії.

Кардінал Сандрі передав поздоровлїня од Веселньского Архієрея і спомянув ёго чісленны вызвы, в котрых одсудив аґресію, просив заставити огень і выйти на путь переговорів. Владыка Ніл подяковав за стрїчу і близкость кардінала. Так само розповів о деякых конкретных припадах, як єпархія помагать страждаючім од войны.

На кінцю стрїчі префект Конґреґації про восточны церькви повів: „Вы пережывате Ґетсіманію, але мы вєдно станеме свідками дня світла і воскресїня,“ інформовав портал.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.