8. 5. 2018: У Вышнїм Комарнику одпрезентують Свободовых вояків

Клуб воєньской історії Свобода (Klub vojenskej histórie Svoboda) вєдно із орґанізаційов „Dukla Destination‟ приготовлюють на 19-го мая 2018-го року подію під назвов Научна стежка бункрами Вышній Комарник, в рамках котрой одбуде ся выставка і презентація воєньскых частей 1-го Чехословацького армадного корпусу ґенерала Людвіка Свободы.

Подія, котра буде проходити од самого полідне аж до осмой годины вечур, одбуде ся в рамках шторічной події Ніч музеїв і ґалерій. Участных орґанізаторы запрошають до катастра русиньского села Вышнїй Комарник, до локаліты недавно зреконштруованых бункрів 3-ой Чехословацькой бріґады.

Як інформує КВІ Свобода на своїм офіціалнім інтернетовім сайтї, в бункрах членове клубу вытворили інтерактівну научну стежку. Каждый бункер є обсадженый даякым воєньскым баталіоном, частёв армады ці зброёв і присутны вояци в нім за помочі навщівників будуть презентовати своє шпеціфічне діятельство.

„В новембрі 1944-го року быв у тых бункрах, респектівно землянках штаб і командатура 3-ой Чехословацькой бріґады, котра належала до 1-го Чехословацького армадного корпусу. Одтыль бріґада рядила діяльство своїх воєньскых частей, котры в тім часї боёвали на юг од Нижнёго Комарника о коту Обшар і навколішнї гірьскы гребенї. Но в рамках выставкы будеме презентовати і іншы воєньскы части, котры належали до 1-го Чехословацького армадного корпусу,“ пишуть орґанізаторы.

Научна стежка має мати дакілько тематічных пунктів, навщівникам буде доступна мапа простору бункрів, до котрой будуть зберати печаткы із каждого тематічного пункту. В лїсї мають быти розміщены боёвы позіції, як і скрыта воєньска позоровательня.

1-ій Чехословацькый армадный корпус ґенерала Людвіка Свободы быв сотвореный в Совєтьскім союзі і боёвав на выходнім фронтї. Свою незаступительну роль мав при боях на Дукляньскім перевалї. Корпус быв твореный чехословацькыма обчанами, котры хотїли знова выбоёвати свободу про свою републіку. За народностями найвекшу ґрупу в нім творили Чехы, за нима Русины і найменше было Словаків. В початках креованя Свободовой армії было найвеце вояків русиньского походжіня.

П. М.