8. 4. 2022: Людміла ШАНДАЛОВА: Сердце, Доколи (Стишкы)

Людміла Шандалова

 

Сердце

На старых воротах

арджа панує,

не треба глядати

ключ страченый,

давно суть одомкнуты,

вычекують,

хто бы їх отворив,

як моє сердце

в куточку місце

тримле про тебе,

ты єсь то не збачів?

 

Доколи

Недопите горня кавы

на столї зістало,

тепло із долонї

вышуміло давно.

 

У крішталёвій вазї

ружічка попрїла,

нїт уже никого,

хто бы ю поливав.

 

Твій парфiн зник,

взяв єсь із собов

моє спаня,

коли?

 

Зохабив єсь жаль.

гладжу го, пещу,

як ружу поливам,

не знам доколи.

 

(Выбране з Літературного конкурзу Марії Мальцовской 2021, 1. місто)