8. 4. 2020: Пряшівскый край рахує з векшыма вытратами і меншыма прибытками. Хоче утримати робітность

Знижіня подїловых дани в повязаню з новым коронавірусом є про Пряшівскый самосправный край (ПСК) выраховане затля на 38 міліонів евр. На бріфінґу то в понедїлёк, 6-го апріля 2020-го року, повіла ведуча Оддїлїня фінанцій ПСК Даґмар Олекшакова.

Інформовала о тім словацька пресаґентура TASR. Як повів пряшівскый жупан Мілан Маєрьскый (на фотцї в центрї), утримати хотять в краю главно робітность.

Є менше прибытків, вытраты роснуть

Подля Олекшаковой грозить, же знижіня прибытків фінанцій буде іщі векше, кедьже прийде і до знижіня прибытків зо вступного в културных заряджінях, з плачіня за інтернаты і плачіня в іншых школьскых заряджінях, котры справує ПСК. Край подля Олекшаковой зачінать реалізовати шпоровливы крокы.

За їй словами на другім боцї ПСК роснуть вытраты повязаны з кроками проти пошырёваня нового коронавірусу в соціалных заряджінях, на урядах, ці в іншых орґанізаціях, котрых ПСК є зряджователём. Далшы вытраты має край зо штрирёма інтернатами, до котрых были даны до повинной карантены репатріанты. Цїлковый фінанчный ефект крізы затля раховати не хотять, кеждьже не є знаме, коли сітуація коло коронавірусу скінчіть.

Край хоче утримати робітность

Як повів председа ПСК Мілан Маєрьскый, в першім шорї хоче край утримати робітность. Найблизшы два рокы подля нёго не будуть найвекшыма інвесторами в рамках краю пріватны компанії, а публічны інштітуції.

„Вуде то передовшыткым Высшый теріторіалный цїлок або держава через свою Словацьку справу драг, може автострады. Зато маєме нагаму выужыти фінанчны средства, котры нам приходять з подїловых дани, передовшткым на інвестованя до краю, жебы мали люди роботу,“ повів жупан з тым, же хотять інвестовати главно до драг і крайскых заряджінь. Додав, же многы з тых, котры вертають споза граніцї, робили якраз в области будованя.

Пряшівскый самосправный край має єдну із найвекшых безробітностей в рамках Словацькой републікы. Многы люде одходили за роботов до заграніча, што в найблизшім часї, якбач, не буде можне.

Проблемы мають і міста

Проблемы з фінанціями уж голосять і міста. Снина, як інформовала аґентура TASR, рахує в повязаню з економічныма ефектами сучасной сітуації з новым коронавірусом зо знижіньом своїх прибытків в лїпшім припадї о 460 тісяч евр. В гіршім аж о 2,5 міліона евр.

„Бюджет сьме мали вже перед тов сітуаційов доста напруженый. Глядати жрідла знижованя вытрат в тій сітуації є вынятково складным,“ повіла про аґентуру ведуча Оддїлїня стратеґічного розвитку Містьского уряду в Снинї Еріка Янкаёва.

Снина в розрахунку на 2020-ый рік раховала з прибытком фінанцій в сумі 18,63 міліона евр. В тім раховали і з пожычков 1,6 міліона евр, з котрой хотїло місто платити другу етапу будованя базену. Задовженость міста ку кінцю 2020-го року втогды выраховали на 42,7 процента. Снина уж за словами пріматоркы міста Даніелы Ґаландовой пожадала о посунутя сплачаня пожычок і приступило ся ку шпоровливым крокам.

Шпорити ся буде в першім шорї на репрезентачных вытратах про пріматорку ці на бенефітах про робітників уряду односно рекреацій. Но суть і далшы области, де буде місто шпорити, наприклад, на товарах і службах в рамках пожарной охраны, публічного порядку, на оправах гріщ, памяток ці на културї. Місто бы подля Янкаёвой знало такым способом ушпорити коло 500 тісяч евр.

Но шпоровливы крокы ся подля пріматоркы Ґаландовой на дають апліковати на вшыткы планованы інвестічны акції міста. „Дакотры інвестіції маєме фінанцованы зо жрідел Европской унії ці іншых фінанчных механізмів,“ пояснила з тым, же підписаны змлувы обовязують місто дотримати часовый грамоноґрам проєктів.

Петро МЕДВІДЬ, ЛЕМ.фм