8. 4. 2020: Приговор премєра на RTVS

  • • Премєр Іґор Матовіч (Здрой: Фото SME – Йозеф Якубчо)

    • Премєр Іґор Матовіч (Здрой: Фото SME – Йозеф Якубчо)

„Добрый вечур, мілы позерателї і слухателї Розгласу і телевізії Словакії,

довольте, жебы єм ся з того місця вынятково приговорив. І обіцям, же буду говорити коротко і щіро.

Дали сьте нам у вольбах повірїня боёвати проти корупції і дістали сьме ку тому як дарунок коронавірус. Ненападного і небезпечного неприятеля, котрый огрожує днесь уж цалком цїлый світ.

Вшыткы влады на світї дістали першых 100 днїв на надухнутя ся. Мы сьме не дістали ани минуту. Од першого дня сьме в повнім насаджіню. Прияли сьме безпрецендентны крокы і днесь видиме, же были правилны. У світой штатістіцї належыме меджі найупішнїшы ктраїны в бою з Covid-19.
Наперек тому, же сьме владу перевзяли в історічно найтяжшій сітуації, денно дістаєме справы зо словами узнаня од европскых лідрів, за нашы выслїдкы.

Лемже тоты выслїдкы не суть нашы. Суть вашы! Без того, жебы сьте вы не насадили до нашого сполочного боя вышу одповідность, рїшіня влады бы зостали лем фалатком папіря.

Днесь але стоїме на порозї далшой великой пробы – од днешнёй півночі платять обмеджіня слободы руху людей. Їх цїлём є єдине – забранити тому, жебы сьме собі дакілько днями ужывня слободы не попсули то , што сьме собі тыжднями страданя сполочно выдобили. Гей, бою ся, абы сьме не потягнули швабликом.
Не буде то приємне, знам. Будуть то односно мене многы політіци знеужывати, знам. Наперек тому певно стою за тыма обмеджінями, бо хранять жывоты нашых найблизшых і были прияты по порадї зо словацькыма челныма епідеміолоґами, іфектолоґами, ці челным представителями верейного здравотництва.
Днесь не єствує овіреный рецепт, як тоту крізу звладнути. Не єствують выходжены стежкы. Ідеме по своїх і затля сьме як сполоченьство одповідных людей успішны. Не попсуйме сі то, прошу.

Решпектуйте, прошу, обмеджіня

Тїшме ся на час, коли сі зложыме рушка і будеме ся мочі вєдно конечно на себе усмівати. Тот час прийде, не бійте ся. Дотогды але мусиме добоёвати наш сполочный бой ... а нашов найлїпшов зброёв є наша одповідность, рішучость і солідарность.
Желам вам красны Великодны свята. Теперь – будуть цілком іншы. Збавлены вшыткых наносів, котры придали люде. Приготованы нато, жебы сьме порозуміли їх основу.
Тоты Великодны свята будуть сімболом мук і наслїдной надії на новый жывот про вшыткых єднако – про хрістіанів і невіруючіх.

Сьме в тім вєдно, докажме то!‟

Портал Уряду влады СР, перетлумачів із словацького языка: А. З.
 

Script logo