8. 3. 2021: Метрополіта Філіп: Хочеме, жебы Підкарпатя сохранило свою церьковну незалежность

27-го фебруара 2021-го року Папа римскый Франціск прияв на авдієнції Высокопреосвященого владыку Філіпа Кочіша (на фотцї злїва), архієпіскопа і метрополіту гайдудороґского. Метрополіта з главов Католицькой церькви бісїдовав і о Мукачівскій ґрекокатолицькій єпархії.

О главных темах, котры з Папом Франціском обговорили, найвысшый представитель Мадярьской ґрекокатолицькой церькви побісїдовав у інтервю, котре дав про мадярьске высыланя Radio Vaticana. Перепис розговору вышов і на порталі Vatican News.

Мукачівску єпархію мам в сердцї

Як владыка Філіп повів у інтервю, окрім задач, котры стоять перед Мадярьсков ґрекокатолицьков метрополійов, ці приготовлінях Евхарістічного конґреса в Будапешті, з Папом римскым Франціском одкрыв тему церьковного положіня ґрекокатоликів на Підкарпатю.

„Она (Мукачівска ґрекокатолицька єпархія, позн. ред.) не є частёв конкретно нашой Ґрекокатолицькой церькви (мадярьской, позн. ред.), лемже зато, же є глубково в моїм сердцї, просив єм Святїшого Отця поговорити і о сітуації, в котрій суть ґрекокатолици на Підкарпатю,“ повів про Radio Vaticana метрополіта.

Вопрос стоїть остро, хочеме sui iuris

„Теперь, по смерти єпіскопа Мілана Шашіка, єпарху Мукачівской ґрекокатолицькой єпархії, вопрос о тім, як буде ся розвивати сітуація з єпархіёв, стоїть остро. Україньскый вплив днесь чує ся дуже міцно. Там (на Українї, позн. ред.) є дакілько метрополій, і кедь Ґрекокатолицька церьков на Підкарпатю так само стане метрополіёв, они хотять, жебы была частёв Україньской ґрекокатолицькой церькви. І мы, і то нелем моя позіція, але і вшыткых, котры походять із Мукачова (Мукачівской єпархії, позн. ред.), зато же мы береме Мукачівску єпархію як материньску – і словацькы ґрекокатолици, і ґрекокатолици в Сербії, в Хорватії, а так само і америцька метрополія в Піттсбурґу – мы дуже хочеме, жебы Підкарпатя годне было сохранити тоту незалежность, котра історічно все была, все была підпорядкована прямо Папови, і така сітуація з Мукачівсков єпархіёв є доднесь,“ пояснив далше владыка Філіп.

Глава Мадярьской ґрекокатолицькой церькви далше повів, же кедь має прийти ку далшому кроку і Мукачівска єпархія бы мала стати метрополітнов церьквов, пак є великым вопросом, ці зістане sui iuris, значіть церьквов свого права – незалежнов. Ці зістане „і надалше підпорядкованов Святому Престолу, або стане метрополіёв у складї великой Україньской ґрекокатолицькой церькви. Рахую за важне выявити нашу позіцію – церькви як такой.“

За словами метрополіты є будучность Мукачівской єпархії одкрытым вопросом. Як в інтервію повів, было приємно побісїдовати з Папом Франціском о многонародностнім і многокултурнім Підкарпатю, котре „днесь є частёв Україны, але еклезіолоґічно, з церьковной точкы позераня, ёго треба тримати окремым, і ёго мож тримати окремов церьковнов единіцёв.“

Адміністратор так само є за окрему штруктуру

За окрему церьковну штруктуру, незалежну од Україньской ґрекокатолицькой церькви, є і владыка Ніл Лущак, котрый по смерти єпархы Мілана Шашіка став апостольскым адміністратором Мукачівской ґрекокатолицькой єпархії.

Іщі в септембрї з ним было публіковане на порталі RISU перше інтервю по тім, што наступив до функції адмністратора.

„То не простый вопрос. Многых знепокоює. Владыка Мілан все бранив мукачівску традіцію. Така є позіція і Апостольского Престола. Я єм так само прихыльником той лінії. То была наша одкрыта позіція,“ повів у інтервю апостольскый адміністратор на тему можливого „приєднаня“ Мукачова до складу україньской церькви.

Петро МЕДВІДЬ, ЛЕМ.фм, языкова управа: ред. АРК в СР, жрідло фотоґрафії: Vatican News