8. 3. 2019: „Найвірнїшый народ“ припомяне собі Ференція Ракоція ІІ.

Місто Шарошпоток, „Вседержавноє Русинськоє Самосправованя‟ і „Шарошпотоцькоє Русинськоє Самосправованя‟ і тот рік у Шарошпотоцї орґанізують подію із нагоды річніцї народжіня Ференція Ракоція ІІ. Русины стрїтять ся під мурами замку того владаря, де є ёго скулптура. Торжественна подія тот рік одбуде ся 23-го марца і проґрам зачне Святов літурґійов в Ґрекокатолицькій церькви свв. Петра і Павла, котру буде служыти отець Янош Мігаль Соноцькый.

 

На події і депутат парламенту

Як інформує сайт русиньской самосправы в Мадярьску, в рамках події ся участным приговорять Ріхард Гёрчік – посланець мадярьского парламенту; Віра Ґіріц, котра є представительков Русинів у парламентї; Др. Янош Ковач – головный правник области Боршод-Абов-Землін; пріматор Шарошпотока Янош Арош і Др. Едіт Тамаш – директорка Музею Ференца Ракоція ІІ., котрый є частёв Мадярьского народного музею. Остатнїм выступаючім буде Др. габ. Шандор Енґі із Реформатьской теолоґічной академії.

На події будудть выступати школярї Основной школы Ференца Ракоція ІІ. і Основной умелецькой школы у Шарошпотоцї. Про участників є приготовлене аґапе, по проґрамі посмотрять собі обновленый реформатьскый храм.

 

Найвірнїшый народ

Русины в Мадярьску честують память Ференція Ракоція ІІ, котрый народив ся 27-го марца 1676-го року в Борші – селї, котре днесь находить ся на теріторії Словакії. В Мадярьску быв у 2015-ім роцї день народжіня той вызначной історічной особности парламентом выголошеный за памятный день.

Ракоцій назвав Русинів „gens fidelissima“ (найвірнїшый народ). Тото названя собі выслужыли за свою вірность, кедь в 1703 – 1711 по боцї Ракоція войовали в неуспішнім бунтї проти Габсбурґів. Ракоцій быв у тім часї князём Трансілванії і паном Мукачівского замку.

Із Ракоціём є повязане і святкованя Дня Русинів в Мадярьску, котрый є встановленый на 22-ый май. Якраз 22-го мая 1703-го року Томаш Есе в Береґсасї (днесь у Берегові на Підкарпатю) підняв заставу і залучів підкарпатьскых Русинів до освободженецькой войны Ференца Ракоція ІІ.

Петро МЕДВІДЬ, ЛЕМ.фм