8. 10. 2024: Карпато-дукляньску операцію припомянули сові на Дуклї і в Празї

Презідент Пеллеґріні спомянув і Україну

6-го октобра 2024-го року припомянули сьме собі 80-ту рочніцю Карпато-дукляньской операції, в рамках котрой боёвав і 1-ый Чехословацькый армадный корпус ґенерала Людвіка Свободы. Русины в тім корпусї были другов найвекшов націоналнов ґрупов по Чехах.

З нагоды округлой рочніцї великы святкованя одбыли ся на Дуклї, у Свіднику, але споминову подію зорґанізовали і в Празї.

У Свіднику і на Дуклї на святкованях, котры орґанізовало Міністерство обраны Словацькой републікы, взяло участь понад 300 запоршеных гостів, включно главного команданта Озброєных сил Словацькой републікы і презідента Петра Пеллеґріні, повіреного председы Народной рады Словацькой републікы Петра Жіґы, і председы словацькой влады Роберта Фіца.

Місце героізму і терпіня

Пеллеґріні на Дуклї повів, же іде о памятне і історічне місце, котре было перед 80-ма роками свідком неспохыбнительного героізму, але і величезного терпіня.

За ёго словами Дуля є місцём, „на котрім была наша днешня слобода выкуплена кровлёв нашых отцїв і дїдів“. Презідент повів, же участникам Карпато-дукляньской операції належыть вдяка – вдяка за одвагу і за пожертвованя властных жывотів в імени лїпшой будучности.

Словацькый презідент, але наприклад і премєр Фіцо, бісдовали переважно о Словаках і словацькім народї, о заслугах Червеной армії, хоць на Дуклї боёвав і чехословацькый корпус Свободы, в котрім найвекшов ґрупов были Чехы і по них Русины, якы вєдно із Словаками і далшыма народностями боёвали за ослободжіня своёй державы – Чехословакії.

Петер Пеллеґріні у своїм приговорі вказав і на то, же в сусїднїй державі – на Українї, теперь проходить война, а же люде уж теперь штодень вмерають і в Росії.

За урґентну повинность світовых лідрів словацькый презідент означів гляданя ефектівных способів, як заставити взаємне забиваня. „Нелем на Українї, але і в Ґазї, Лібанонї, і всягды там, де люде підлягли помыленому і барз небезпечному пересвідчіню, же свої незгоды вырїшають смертёв своїх противників,“ повів Пеллеґріні на Дуклї.

Святковало ся і на Народнім памятнику на Віткові

Святкованя 80-ой рочніцї Карпато-дукляньской операції одбыли ся і в Празї, на Народнім памятнику на Віткові.

„Верьховны представителї резорту Міністерства обраны Чеськой републікы, але передовшыткым участник боїв коло Дуклї, ґенерал Милослав Масопуст, собі днесь на Народнім памятнику на Віткові припомянули 80-ту рочніцю Карпато-дукляньской операції. Тота мала підпорити Словацьке народне повстаня,“ інформовав чеськый резорт обраны на своїм сайтї.

Чеська міністерка обраны Яна Чернохова почас пєтного акту вєдно з ґенералом Масопустом положыли квітя на гроб незнамого вояка, котрый впав на Дуклї перед 80-ма роками.

Чернохова припомянула і то, же многых героїв з Дуклї комуністічный режім по пучі з фебруара 1948-го року переслїдовав або докінця забив. За їй словами вшыткых героїв із Дуклї, чехословацькых вояків, вшыткых народнотей, капчала „ідея слободы, одданость отцюзнинї, воєньска честь і статечность“.

Чеському Міністерству обраны тот рік подарило ся доглядати мена 668 вояків, котры впали на польскім боцї Дукляньского перевалу, і міністерка в повязаню з тым повіла, же слїдуючій рік ся планує у сполупраці з польскым містом Дукля зробити новый войновый гроб присвяченый тым воякам.

Петро МЕДВІДЬ, ЛЕМ.фм, языкова і ґрафічна управа: АРК в СР.

Фото: Міністерство обраны СР і Міністерство обраны ЧР.