8. 1. 2025: Неправом забытый

„Зыйде з очей, зыйде з мыслї.‟ Тота пословіця ня напала главно у связи многых тых, котры пішли до вічности, але часто є актуална і одностно жыючіх особностей. Напала ня і при Русинови МУДр. Василёви Янкови, котрый є знаменитым одборником у сферї дїтьской кардіолоґії, на котрого бы не мали забыти холем тоты, котрым поміг. Тадь він поміг стовкам дїтей, а тым і їх родічам. Єдным з такых єм і я, котрый єм не раз быв за Паном Доктором зо своёв дївков.

Але попри выконованю своёй професії довгы рокы ся анґажовав і у културно- сполоченьскім і політічнім жывотї міста Пряшів, наприклад, як довгорочный актівный посланець містьского заступительства. Але про нас, Русинів на Словакії, він ся немало анґажовав у возроднім процесї. А ту треба спомянути главно ёго заслугу в тім, же в Пряшові єдну з тогды новых уліць назвали РУСИНЬСКОВ, а не Пражсков, як было спочатку пропоновано.

Также, Василю, холем теперь собі на Тебе споминаме з нагоды жывотного і кедь не округлого юбілею (нар. 8. 1. 1943 у русиньскім селї Кобасов, окр. Снина на Словакії). Желаме Тї главно кріпке здоровя, іщі много хосенно зробленого на благо нелем Русинів, але многых людей-паціентів. Але няй ся Ті дарить і у менше знамім твоїм умелецькім дїятельстві як поетови.

При тій нагодї споминаме на Тебе і про нарис о Тобі нашой бывшой колеґынї ПгДр. Марії Мальцовскій під назвов Ода на сердце, котрый быв опублікованый Світовым конґресом Русинів у 2009 роцї у книзї 100 вызнамных Русинів очами сучасників, ІІ. часть. Цїлый тот актуалізованый нарис о добрім чоловікови, знамім одборникови, невтомнім дїятелёви, гордім Русинови – МУДр. Василёви Янкови каждый буде мочі собі прочітати у другім тогорочнім чіслї културно-хрістіаньского двоймісячника Русин.

На многая і благая лїта!

А. Зoзуляк