8. 1. 2021: Гелена ҐІЦОВА-МІЦОВЧІНОВА: Молитва матери (2) (Стишкы)

Гелена ҐІЦОВА-МІЦОВЧІНОВА

Молитва матери (2)

***
Молять ся Отче наш
молоды і стары,
в молитві чекають
божы милодары.

Заспокоять сердце 
словечком утїшным,
што шле Отець з неба
убогым і грїшным.

***
Буду я ся хрістіаньской
віры ся тримати,
бо під своїм омофором
хранить Божа Мати.

Отця, Сына і Святого Духа
ниґда не опущу,
бо нас кормить ту на земли
все їх хлїб насущный.

Жебы в здравю, щастю, мирї
в світї люде жыли,
створітелю неба, землї
вірно все служыли. 

***
Ношу Тройцю в своїм сердцї,
не дасть мене украсти,
могла бы єм без помочі
до пропасти упасти.

Молитвенник до рук беру,
іду ся молити,
а за одпущіня грїхів
Бога все хвалити.

Яке буде у молитві 
днесь моє прошіня?
Дай же Боже грїшній душі
милость, розгрїшіня.

***
Не утїкають дїти
од Божой наукы,
а беруть молитвенник
каждй день до рукы.

Тай не забывають
на дїтьску Біблію,
в якій найдуть щастя,
покій і надію.

А в молитві денній
здравя попросити,
жебы в сердцї могли
Ісуска носити.

***
Нічка вечур здогонила,
тай на дзвінок задзвонила.

Отворила дверї мати
і укладать дїтей спати.

Із молитвов день скінчіли,
што од мамкы ся научіли.

Выслухали Божу раду
та на себе крижик кладуть.

Світять в небі звізды ясны,
няй ся сниють сны прекрасны.

Жебы дїти здравы встали,
світле рано привітали.

Та довєдна рукы зложать,
няй їх хранить Мати Божа.

А до щастя дражка вела
під крылечком Архангела.

(З приправлёваной книжкы Гелены Ґіціовой-Міцовчіновой – Поклад русиньской матери.)