7. 9. 2017: В Пряшові собі припомянуть Михала Чабалу

3-го авґуста минуло 15 років од смерти Михала Чабалы, котрый быв неоддїлительнов частёв пряшівской вытварной сцены, но і жывота пряшівскых уліць. Тоту річніцю вырїшыло припомянути собі Обчаньске здружіня Русиньскый коморный театер, котре із той нагоды приготовило выставку творів Чабалы.

14-го септембра 2017-го року од 17.00 год. одбуде ся в пряшівскій літературній кавярнї Віола подія під назвов Спомины на Міша. Буде то вернісаж выставкы мало знамых рисунків Чабалы із пріватной збіркы Мілана Хомы, котрый із Чабалом быв близкый приятель. В рамках вернісажі прийдуть на Михала Чабалу окрем Мілана Хомы заспоминати і автор кресленого гумору Федор Віцо, фотоґраф Ладіслав Цупер і бывша директорка Шарішской ґалерії в Пряшові Марта Гребічкова. Проґрам вернісажі буде доповненый о відеопроєкції з Михалом Чабалом – промітаня фотоґрафій з молодшых років, архівных заберів з умелцём і документу, котрый з Чабалом зробив куратор Музею модерного уменя Енді Варгола в Меджілабірцях Михал Бицко. Запрошіня на подію прияла і Анна Порачова, котра обогатить проґрам народныма співанками.

Михал Чабала быв академічный малярь, котрый ся народив 4-го фебруара 1941-ім р. в русиньскім селї Нижні Чабины недалеко Міджілаборець. В рр. 1958 – 1962 штудовав у Бырнї мальбу в архітектурї. Потім в рр. 1962 – 1963 робив пропаґачного вытварника в Музею україньской културы у Свіднику. Од р. 1963 аж до р. 1969 штудовав на Высокій школї вытварных умень в Братїславі у професорів Міллого, Мудроха і Матєйкы. По куртій карьєрї на Вытварній катедрі Педаґоґічной факулты в Тырнаві у 1972-ім роцї выбрав собі жывот слободного умелця. Быв остатнім богемом пряшівской вытварной сцены. Од 1974-го року быв членом Союзу словацькых вытварных умелцїв.

У творчости Михала Чабалы, котру презентовав на майже 60-ёх колектівных і 6-ёх персоналных выставках, доміновали пейзажы, но любив малёвати і театралны мотівы, якостны были ёго портреты ці закутя. На пейзаж мав Чабала выняткове чутя.

Умер 3-го авґуста 2002 р. у Пряшові.

П. М.