7. 8. 2024: В Новім Садї рихтують сімпозій о Діонізіёви Нярадіёви
Як інформує аґентура Рутенпрес, 5-го авґуста 2024-го року одбыла ся в Новім Садї, в просторах Заводу про културу войводиньскых Русинів, перша стрїча Єпархіалного комітету про святкованя 150-ой річніцї од народжіня ґрекокатолицького єпіскопа Діонізія Нярадія.
На стрїчі обговорив ся план пририхтованя Меджінародного наукового сімпозія „Владыка Діонізій Нярадї: жывот і дїло“, як і далшых подїй, котры суть повязаны з тым юбілеём.
Планованый сімпозій бы мав проходити в другій половинї новембра того року в Руськім Керестурї і Новім Садї з тым, же буде орґанізованый Єпархіёв святого Николая у сполуппраці із Ужгородьсков націоналной універзітов і Заводом про културу войводиньскых Русинів. О точнім датумі будуть орґанізаторы іщі інформовати.
Владыка Діонізій Няраді народив ся 10-го октобра 1874-го року в Руськім Керестурі, предкы походили із днешнёй выходной Словакії. Богословскы штудії абсолвовав у Загребі, закінчів їх докторатом і у 1899-ім роцї там быв рукоположеный на священика.
На єпіскопа рукоположыв го архієпіскоп Лазар Младенов у 1915-ім роцї в Римі. Аж до 1920-го року быв апостольскым адміністратором Крижевацькой єпархії, пак став єпархіалным єпіскопом.
Ёго єпіскопске дїяня є скапчане і з Карпатьсков Русёв. У 1922-ім роцї Святїшый Престол призначів владыку Діонізія за апостольского адміністратора Пряшівской єпархії. В тім самім часї вів паралелно і свою Крижевацьку єпархію, а то аж до 1927-го року, коли Пряшівска єпархія дістала нового адміністратора, пізнїше єпарху – Павла Петра Ґойдіча.
В роках 1938 аж 1939, штири місяці, быв іщі апостольскым адміністратором в Хустї. То быв резултат окупації части Підкарпатьской Руси Мадярьском по Віденьскій арбітражи. Дале єствовала Мукачовска єпархія під веджінём владыкы Александра Стойкы, то была менша часть під мадярьсков окупаціёв, і решта єпархії на Підкарпатьскій Руси была дана до адміністрації Нярадія. Владыка вмер 14-го апріля 1940-го року.
Петро МЕДВІДЬ, ЛЕМ.фм, языкова і ґрафічна управа: АРК в СР
