7. 8. 2021: Ґрекокатолици зачали 40-днёву приправу перед стрїчов з Папом

Папа в Пряшові на стрїчі з ґрекокатоликами осдлужыть Божеску літурґію св. Йоана Златоустого.

6-го австуста 2021-го року, на праздник Преображенія за ґриґоріяньскым календарём, вступили ґрекокатолицькы віруючі на Словакії до духовной приправы перед навщівов Святїшого Отця Франціска в Пряшові.

Як інформовав Михал Павлишіновіч, говорця Пряшівской архієпархії, пиправа буде тырвати точно 40 днїв, кедьже Папа одслужыть Божеску літурґію св. Йоана Златоустого в Пряшові на праздник Воздвиженія Честного Креста, дня 14-го септембра 2021.

Ку зачатку духовной приправы выдали єпіскопы Рады єрархів Ґрекокатолицькой церькви на Словакії пастырьске писмо, котре ся на праздник Преображенія чітало у вшыткых ґрекокатолицькых храмах на Словакії.

40 днїв як перед великыма праздниками

Як підкреслив Павлишіновіч, восточны церькви на вызначны праздникы літурґічного рока приготовлюють ся якраз 40-днёвым періодом молитвы і посту. Ці іде о Святу велику чотыридесятніцю перед Пасхов, або о Філіповку перед Рождеством.

„Тота сімболіка 40-днёвой молитвенной пути аж ку стрїчі з наслїдником апостола Петра зачінать якраз на праздник Преображенія, котрым сьме вшыткы покликаны дашто змінити у своїм жывотї,“ інформує архієпархія.

Любомір Петрик, протосінкел Пряшівской архієпархії і главный коордінатор приправ навщівы Папы римского Франціска в Пряшові інформовав, же Ґрекокатолицька церьков ся, окрем своёй духовной приправы, залучіть і до цїлословацькой духовной приправы, котра буде завершена 15-го септембра 2021, на праздник Сімстрастной Дївы Марії, покровителькы Словакії, коли буде Вселеньскый Архієрей в Шаштїнї.

Історічна подія

Віруючі собі на офіціалнім сайтї Пряшівской ґрекокатолицькой архієпархії можуть стягнути і брожуру, котра была з той нагоды выдана.

„Брожуру вам пропонуєме як проводника духовнов приправов на історічну навщіву Святїшого Отця Франціска в Пряшові, в рамках котрой буде на праздник Воздвиженія Честного і Жывотворящого Креста 14-го септембра головным служытелём Божеской літурґії нашого отця святого Йоана Златоустого, на котрій буде мати проповідь. Ніч векше як служіня святой літурґії про нас в духовнім жывотї не єствує. Ніч веце, што бы Святїшый Отець міг з нами торжествовати, не познаме. Зато бісїдуєме о історічній і може неповторятельній події,“ повів Петрик.

У брожурї суть приговоры вшыткы трёх єрархів Ґрекокатолицькой церькви на Словакії, пряшівского архієпіскопа метрополіты Йоана Бабяка, кошыцького єпархы архієпіскопа Кіріла Василя і братїславского єпархы владыкы Петра Руснака. Так само обсягує пастырьске писмо, різны катехезы, молитвы акфістів ку Клокочівскій Пресвятій Богородіцї і ку святому Йосифови.

Папа навщівить штири міста

Папа Франціск почас своёй навщівы Словакії в днях 12-го аж 15-го септембра 2021 навщівить Братїславу, Кошіцї, Пряшів і Шаштїн.

Стрїтить ся з трёма найвысшыма конштітучныма дїятелями, з представителями хрістіаньскых церьквей, з представителями Жыдівской реліґійной общіны, ці з ромсков комунітов. В Пряшові буде мати стрїчу з ґрекокатоликами, де одслужыть літурґію і буде проповідати.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.