7. 7. 2024: Рада єрархів засїдала в Братїславі

В днях 1-го і 2-го юла 2024-го року на Єпархіалнім урядї в Братїславі проходило 36-те пленарне засїданя Рады єрархів, котрой членами суть ґрекокатолицькы єпіскопи із вшыткых трёх єпархій на Словакії. Інформовав о тім за Братїславску єпархію Стано Ґабор.

Засїданя скликав пряшівскый архієпіскоп і митрополіта Йона Максим, глава Ґрекокатолицькой церькви на Словакії, участны были і братїславскый єпарха владыка Петро Руснак, помічный єпіскоп Братїславской єпархії владыка Мілан Лах, котрый є секретарё Рады єрархів, і кошіцькый єпарха – архієпіскоп Кіріл Василь.

Было то історічно першый раз, коли засїданя Рады єрархів проходило на теріторії Братїславской єпархії.

На початку засїданя навщівив апостольскый нунцій в Словацькій

републіці  архієпіскоп Нікола Джірасолі, якый выразив радость, же Ґрекокатолицька церьков під веджінём нового митрополіты успішно розвивать ся.

Владыкове занимали ся вецеро актуалныма темами. Обговорили недавну навщіву Ad limina apostolorum у Ватіканї, в рамках котрой навщівили і Дікастерію про восточны церькви а стрїтили ся з префектом дікастерії – кардіналом Клаудіом Ґуджеротті.

Темов была і формація будучіх священиків, літурґічны тексты, были зряджены і дві митрополітны комісії – економічна і катехтетічна. Єпіскопи занимали ся і актуалным станом процесу схвалёваня партікуларного права, вопросом апостольского візітатора про ґрекокатоликів у Европі і приправов подій на Юбіленый рік 2025.

Найблизше засїданя Рады єрархів має одбыти ся в Бадинї на початку новембра 2024.

Петро МЕДВІДЬ, ЛЕМ.фм, языкова і ґрафічна управа: АРК в СР.