7. 7. 2021: Україньскый парламент не узнав Русинів за корінный народ

Верьховна рада Україны 1-го юла 2021-го року схвалила в другім чітаню пропозіцію Закона о корінных народах Україны. За закон голосовало 325 посланцїв, што є понад конштітучну векшыну в парламентї.

Свої голосы дали вшыткы парламентны фракції, окрем Опозічной платформы – За жывот (Опозиційна платформа – За життя). В законї суть за корінны народы Україны узнаны лем кримскы Татары, Караїмы і Кримчакы – жыдївске населїня, котре бісїдує кримскотатарьскым языком.

Хоць Закарпатьска область Україны дістала ся до складу Україны аж по Другій світовій войнї, ниґда перед тым не была частёв Україны, і народ, котрый доміновав на історічнім Підкарпатю быв все русиньскый, в законї Русины в списку корінных народів не суть.

Приговорили ся лем за Ґаґаузів

 Закон, котрый быв приятый україньскым парламентом, говорить, же корінным народом Україны є автохтонна етнічна комуніта, котра сформовала ся на теріторії Україны і є носителём самобытного языка і културы. Условієм є і то, жебы не мали такы народы свою такзвану домовску державу.

Русины, хоць сповнюють тоты условії, до списку корінных народів не дістали ся. Не дістали ся там ани Ґаґаузы.

Но почас обговорїня пропозіції закона в парламентї посланець Анатолій Урбаньскый бісїдовав о тім, жебы в будучности продумала ся можность дати до списку корінных народів Україны іщі і Ґаґаузів, котры суть автохтонныма в Молдавії і на Українї. „Жебы было чути і голосы нашых Українцїв ґаґаузького походжіня,“ повів депутат. За Русинів не приговорив ся.

До Верьховной рады Україны вніс тоту леґіслатівну ініціатіву презідент Володимір Зеленьскый. Зробив то 18-го мая того року, в День памяти жертв ґеноціды кримскотатарьского народа.

Україна довгодобо потискує права Русинів

Приятя закона о корінных народах Україны, в котрім хыбують Русины, є лем далшым продовжінём довгодобого потискованя прав Русинів на Українї. Тото зачало комуністічным режімом і тырвать доднесь.

Київ офіціално не признавать єствованя Русинів. Русины як народность на Україні суть узнаны лем Закарпатьсков областнов радов. Рада тото рїшіня прияла у 2007 роцї. Не раз вже тото рїшіня было з боку україньскых націоналістів атаковане.

 

Петро МЕДВІДЬ, ЛЕМ.фм, ґрафічна і языкова управа: ред. АРК в СР. Жрідло

фотоґрафії: www.epublishing.cz.