7. 7. 2021: ТАД одпремєрує приповідку Царь пав

Русиньскый Театер Александра Духновіча в Пряшові на пятніцю, 9-го юла 2021-го року, рихтує премєру приповідкы Царь пав. Головну роль собі заграє Ладіслав Ладомиряк (на фотцї). Приповідку повну музикы режійно приготовлила Зузана Ґалкова.

„Колись давно в царьстві за морём жыло ся в безмірнім добробытї. Но люде вшытко зачали брати поверьхно, добробыт їм закрыв очі і відїли лем вонкашню красу. То царя доброго і справедливого барз скламало і ёго смуток і гнїв запричінили, же вшыткы ёго підданы змінили ся на павы. Кажду ніч на пава змінить ся і царь. Сам і опущеный глядать щастя. Хто і што царя выслободить? Буде то любов? В іншім царьстві, далеко од моря, якраз народила ся красна прінцезна Руженка, котра своїм добрым сердцём перенесе ся через вшыткы проблемы,“ пише ся в анотації новой приповідковой пєсы.

Приповідка Царь пав є на мотівы мадам д‘Улнуа, котра в 17-ім столїтю позберала і обробила приповідкы, котры люде бісїдовали собі на французькых селах. Кедьже была із шляхты – баронка, оддзеркалило ся то і на приповідках, котры обсягують вельо красы і одкрывають брану до чарокрасной, пречудесной загороды.

Окрем Ладомиряка, в ролях представлять ся Зденка Кваскова, Владимір Рогач, Мартін Оравец, Осиф Пантликаш, Ярослава Сисакова в алтернації із Владиміров Штефаніковов, Івета Фейкова і Михал Куцер.

Царь пав є 385-ов премєров Театру Александра Духновіча в ёго 75-ій сезонї. Премєра одбуде ся на Великій сценї ТАД о 17.00 год.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.