7. 5. 2021: Пряшівскый край підпорив проєкты в реґіонах за 1,28 міліона евр. Найвеце ішло на културу

Першу тогорічну суму грошей до реґіонів із крайскых дотачных схем в понедїлёк, 3-го мая 2021-го року, схвалили депутаты Пряшівского самосправного краю (ПСК). Цілково підпорили 478 жадостей в проґрамах Шпорт, Култура і Соціалны службы в сумі 1,28 міліона евр.

Як інформовала Леа Геілова з Одділіня комунікації і пропаґації ПСК, схвалены дотації были в рамках Вызвы Мікропроґрам ПСК.

„Тот проґрам фунґує і вдяка посланцям і взаємнодіяню того, же сьме пустили пінязї і про меншы проєкты, ці уж то суть културны, шпортовы ці зо соціалной области. Цїлково сьме підпорили 478 проєктів. Я пересвідченый, же тоты дотації досправды поможуть в даякім смыслї рушыти допереду жывот в тых областях в окремых окресах, селах і містах. Я радый, же сьме таку форму підпоры не заставили і можеме помочі в оддаленїшых частях нашого краю,“ повів председа Пряшівского самосправного краю Мілан Маєрьскый.

Найвеце грошей ішло до културы. Край в тій области підпорив аж 286 жадостей в цїлковій сумі понад 719 тісяч евр. Дотації жадателї схоснують на будованя, реконштрукцію і модернізацію културных і сакралных памяток, але і на їх оправы і утримованя.

Но так само ся дотації схоснують на нематеріалну културну дїдовизну, значіть на орґанізацію културных подій, єднако і на підпору фолклорных колектівів і ґруп ці на выдавательске дїятельство.

До Вызвы Мікропорґрам ПСК цілково пришло 592 жадостей, з того крітерії не сповнило 17 з них. 114 жадателїв не было підпореных.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.