7. 12. 2018: Вышли два книжочкы на память монастырям

В тых днях вышли два книжочкы русиньского поета Мілана Ґая з Меджілаборець, родака із села Суків, Меджілабірьского окресу, члена Сполку русиньскых писателїв Словениска, а то Krasnobroďskyj monastyr´  i Bukivskyj monastyr´ (Меджілабірцї: Друкарня свідницька, с. р .о., 2018), котры суть написаны по русиньскы, але латиніков. Уж самы назвы говорять на память чому суть присвячены. Обидві мають стишкы набоженького характеру, а такы выдав і у своїй першій книжцї Молитва Русина (Пряшів: Академія русиньской културы (АРК) в СР, 2012) і в Моїм родакам (Пряшів: Сполок русиньскых писателїв Словеньска, 2016). Подобного характеру зборник духовной і реліґійной поезії хоче авторови выдати АРК в СР і на рік 2019, бо такой поезії в русиньскій літературї на Словакії є недостаток. Віриме, же тоты книжкы заінтересують русиньскых чітателїв.

-аз-