7. 10. 2024: ОСРС выголосив рік 2025 за Рік русиньского языка

В пятніцю, 4-го октобра 2024-го року, в Пряшові одбыло ся 38-ме засїданя Округлого стола Русинів Словакії (ОСРС), котре вів председа той русиньской платформы Петро Штефаняк.

Членове окрем іншого дістали інформацію о роботї, котра проходить в окремых комісіях ОСРС – історічній, културній, леґіслатівній, про реґіоналный розвиток і самосправы, про школство і русиньскый язык, а церьковній комісії.

Членове были так само інформованы о тім, же послїдня спомянута комісія – церьковна, дістала нового коордінатора, котрым став ґрекокатолицькый священик Іґор Панчак. Тота зміна пришла на основі факту, же до ОСРС недавно вступила нова членьска орґанізація, котров є Общество святого Йоана Крестителя.

Якраз тота орґанізація має велику заслугу на перекладах літурґічных і біблічных текстів на русиньскый язык і на душпастырьстві русиньскых ґрекокатоликів у їх материньскім языку.

До ОСРС вступила в остатнїм часї іщі єдна орґанізація, котров є Асоціація русиньскых подникателїв. Асоціація была основана у 2023-ім роцї з цїлём, жебы підтримовати сполупрацу русиньскых бізнісменів, русиньску културу, язык і традіції, а творити условії про їй розвиток.

У 2025-ім роцї Русины на Словакії припомянуть собі 30 років од святочного выголошіня кодіфікації русиньского языка в Братїславі, што было першым із сповненых цїлїв, котры собі Русины із Словакії а далшых країн дали на 1-ім Конґресї русиньского языка в Бардеёвскых Купелях у 1992-ім роцї.

27-ый януар 1995-го року тым став важным історічным пунктом, котрый потвердив самобытность і укрїпив еманціпацію Русинів по роках українізації. І вдяка кодіфікації є днесь русиньскый язык языком театру, пресы, медій, Русины мають своє властне радіове і телевізне высыланя, властный інштітут на Пряшівскій універзітї, а русиньскый язык має своє місце і в освітнім процесї на школах.

Кедьже выголошіня кодіфікації русиньского языка належыть меджі найважнїшы моменты возродного процесу по 1989-ім роцї, ОСРС на своїм засїданю прияв рїшіня, котрым выголосив рік 2025 за Рік русиньского языка.

ОСРС представить лоґо юбілейного року, як і актівности повязаны з тым роком, котры будуть заміряны на пропаґацію і хоснованя русиньского языка, початком рока.

Членове у вольбах потвердили у своїх функціях говорцю ОСРС Петра Медвідя і секретаря Мафтея Допіряка на далшый дворочный період. Так само в рамках ротуючой презідії собі платформа зволила двох новых членів, котрыма стали Йосиф Бадида за індівідуалных членів і за колектівных членів Мілош Стрончек, котрый є председом Окресной орґанізації Русиньской оброды у Свіднику – членьской орґанізації ОСРС.

ОСРС на своїм засїданю так само прияв рїшіня, же зробить далшы крокы, жебы вырїшыти проблему збірковых фондів, якы походять із русиньскых сел, а дотеперь суть частёв СНМ – Музея україньской културы у Свіднику, де суть презентованы як артефакты україньской културы, з чім Русины не можуть быти согласны.

П. М., языкова і ґрафічна управа: АРК в СР