7. 10. 2021: Русиньскый музей мать салу Михала Дубая
(позн. ред.: шкода лем, же над рельєфом M. Дубая не є і назва по русиньскы азбуков, кедь є то в русиньскім музею)
В Словацькім народнім музею – Музею русиньской културы в Пряшові одбыла ся в пятніцю, 1-го октобра 2021-го року, святочна подїя. Новозреконштруованы просторы дістали назву Выставна сала Михала Дубая і на стінї прибыла памятна табла, котра припоминать тоту особность русиньской културы на Словакії.
На подїї были участны і членове шырокой родины Дубаёвых. Таблу подаровала дївка Михала Дубая. Автором той таблы є далшый русиньскый вызначный вытварник Штефан Гапак.
Реконштруовали почас короны
Хоць минулый рік дїятельстрво русиньского музея, главно што до подїй про публіку, была так само єден час цалком перервана, припадно была можлива лем в обмедженых обставинах вдяка пандемії, робітници інштітуції не зістали без роботы.
Окріе іншого, пустили ся до великой реконштрукції просторів на приземнім штоку, і так в будові, котра довгы рокы служыла як касарнї, выникли першы досправдовы выставны просторы, котры музею барз хыбовали.
Першов выставов, котра в новых красных просторах была сприступнена про людей, была выстава під назвов Дубайовы – Анна і їй дїти. Тота мала свою вернісаж 4-го юна, в день, коли народив ся Михал Дубай, русиньскый вытварник і културно-сполоченьскй дЇятель.
Концепція выставы обсягoвала выбер із творчости Михала і Ореста Дубайовых, найстаршого і наймолодшого із семох сородників, але і особны річі а оцїніня вшыткых семох дїтей ґрекокатолицького священика Дезідерія Дубая і ёго жены Анны, родженой Калиняковой, а так само артефакты і публікації з творчости їх дїтей, внуків, внучок.
Выставна сала Михала Дубая
Уж втогды было вырїшено, же новы просторы, котры мать теперь музей, дістануть святочно назву по Михалови Дубаёви. Тото стало ся реалностёв в пятніцю, 1-го октобра, коли торжество музей споїв із дерньєров споминаной выставы родины Дубаёвых. Офіціално выстава закінчіла ся в понеділёк, 4-го октобра, в день, коли Михал Дубай вмер.
О родинї Дубаёвых в новых просторах бісїдовала наперед директорка музея Люба Кральова (на фотцї), пак свій приговор, главно о Михалови Дубайови, мала і кураторка музея Даніела Капралёва. Обидві потвердили, же за штири місяцї, почас котрых тота выстава в музею была, їм Дубаёвы приросли ку сердцю і тота выстава, як і родина, стали якбы частёв і їх жывотів.
На кінцю події святочно одкрыла памятну таблу Даніела Капралёва, чім просторы офіціално стали Выставнов салов Михала Дубая.
Михал Дубай
Михал Дубай (рр. 1910 – 1993) быв малярём, котрый мав вызначну културо-творчу роль в Пряшові. Брав участь на основаню научной бібліотекы в Пряшові, Україньского націоналного театру (днесь русиньскый Театер Александра Духновіча), Музея україньской културы у Свіднику, а робив і в области памяток – сполуосновав Памятковый уряд в Пряшові, быв педаґоґом, редактором, публіцістом і културным робітником.
Знамішым быв го наймолодшый брат Орест Дубай (рр. 1919 – 2005), котрый быв ґрафіком, малярём, скулптором, ілустратором і вызначным высошкольскым педаґоґом.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
